Biblioteca Nacional Aruba ta presenta den e edicion aki e invitadonan special for di Hulanda.
Autornan di buki pa mucha, ilustrador, contador di storia y presentador di programa pa mucha.
Total tin 25 invitado pa e Festival di Buki pa Mucha cu durante henter un siman ta bishita como 60 scol riba nos isla pa asina celebra e di 25 edicion di e festival. ‘Wanta.. Sigui lesa …no spanta!’. Cu nan buki y material visual bou cocodek nan ta drenta klas, hunto cu un guiador. Pa un lesuurlo laga e mucha cera conoci cu buki, storia y bunita ilustracion y claro nan ta conta algo di nan mes. Tur esaki pa stimula mucha pa lesa buki y tambe bishita biblioteca un poco mas. Lesamento ta keda algo esencial den desaroyo di un mucha. Mariella van de Beek a cuminsa pinta tempo cu e tabata mucha chikito y asina e tabata bay den un mundo di fanatasia. Mariella ta biba su soño ilustrando buki pa mucha y otro publicacionnan. Mariella a diseña e logo di e Festival di Buki pa Mucha y aña pasa el a ilustra e buki di Curt Fortin “Un Co…co…colebra grandi!”. Curt Fortin a nace na Aruba pero cu 5 aña e cu su famia a bay biba na Hulanda. Semper su deseo tabata ta pa actua y canta y el a crea e personahe ‘Yakanuko’. E ta traha hunto cu ilustrador Nick van Leent y nan a gana un premio na Hulanda pa e creacion aki. Nan ta bin e festival na Aruba pa e di dos biaha.
Jeroen Hoogerwerf ta participa pa di tres biaha. Hunto cu autor di buki pa mucha Liliana Braamskamp- Erasmus el a skirbi un buki di storia y poesia titula ‘Overal monster en spoken’. E buki aki tin tremendo ilustracion di Mariella van de Beek y Vanessa Paulina. Sjoerd Kuyper a skirbi mas cu cincuenta buki pa mucha den su carera como autor y a gana diferente premio. Sjoerd Kuyper a skirbi e regalo di siman ‘Het spannendste boek van de wereld’. Esaki a keda ilustra pa artista visual Stan Kuiperi. E buki ta na Papiamento tambe, danki na Evelyn Ruiz-Croes (E buki mas excitante di mundo). Tanto Sjoerd como Stan ta bishita scol pa conta storia y splica e topico di ilustracion di buki y di arte. Nick van Leent a nace na Den Haag na 1985 y e ta specialisa den computers y ilustracionnan grafico. Nick ta bishita diferente scol na Aruba hunto cu Curt Fortin. Ya pa mas cu 5 aña nan ta crea hunto, soña hunto, spaar placa pa desaroya tecnicanan nobo y asina hunto nan a descubri un mundo nobo. Paul van Loon a skirbi masha hopi buki mes y ta bon conoci pa su serie ‘Griezelbus’.
Su bukinan a keda traduci den varios idioma. Paul van Loon ta duna su presentacionnan mainta den Cas di Cultura pa e scolnan invita. Ademas di esey Paul van Loon ta duna un presentacion special na Cas di Cultura, diamarsdia 7 di november pa 6:30 di atardi y lo tin presentacion sorpresa di varios autor, contado di cuenta y ilustrado participante na e festival. Carchinan ta obtenibel na biblioteca na balor di 5 florin. Biblioteca Nacional Aruba ta invita tur mucha pa e fiesta di apertura diabierna dia 3 di november di 6or pa 8or, patras di biblioteca na Playa.
Sjoerd Kuyper
foto;Ineke Oostveen
