E soca Feeling Good, Feeling Nice di Casper tabata un cancion cu a dal duro durante e temporada di Carnaval 69. Den fin di siman, DURO Entertainment hunto nos Rey di Soca, Casper, a bini hunto p’asina celebra den un solo famia e exito di Carnaval 69.
BARROS
Feeling Good, Feeling Nice tabata un creacion di DURO Entertainment. Sergio Barros, tabata un di e compositornan di e soca ‘Feeling Good, Feeling Nice”. El a bisa cu tabata despues di varios aña cu DURO Enterainment tabata bek den e Caiso & Soca Monarch. Tabata Jair Dijkhoff cu a acerca Maiky Oliva, na un manera hopi spontaneo.
Manera ya Campo a indica, e cancion tabata eigenlijk un cancion promocional pa DURO, pero Oliva a pas’e pa Jaiggo (Jair Dijkhoff). Pero despues nan a hinca e idea den otro y a logra forma e banda, train, bay riba stage y durante pre-final, el a pega. Y lo demas ta historia.
Personalmente, Sergio Barros a bisa cu e idea di bay cu e festival hopi trempan, ta algo cu sigur ta uno hopi bon. Asina tur e cantantenan tin e oportunidad di promociona nan cancion, mas airtime.
Pa loke ta Carnaval 70, e ta un challenge. Ya caba DURO Entertainment ta kibrando cabes caba pasobra cu ta un reto mas grandi pa Casper bay defende y retene su titulo.
DURO Entertainment kier bin cu ideanan innovativo. Y un di e ideanan aki ta pa pusha e muchanan c’un tempo a participa den hubenil y despues no a subi e escenario grandi mas, pa nan tambe bin bek pa yuda engrandece e festival.
Pero un cos ta sigur, nan lo zorg pa Casper bin mesun of mas duro cu e aña aki.
OLIVA
Un di e compositornan di e cancion tabata Maiky Oliva, a cuminsa na bisa cu nan a traha hopi duro riba e cancion aki. For di october y mita luna di november, e trabou duro a cuminsa, preparando Casper pa su momento, ya cu tabata su prome biaha. Tabata hopi trabou, pero sigur hopi contento tambe.
Pa loke ta Carnaval 70, ya caba e preparacionnan a cuminsa. DURO Entertainment, a indica cu nan lo kier bay cu maximo 3 cantante y Casper sigur lo ta un di nan, pa bay defende su titulo. Ya caba e preparacionnan a cuminsa. E trabou pa defende, sigur ta un trabou mas duro. Ta un grupo cu a toca hopi tempo cu otro y sigur e resultadonan tabata grandi.
E cancion ‘Feeling good, feeling nice’, tabata un cancion cu tabata diseña pa a bira un promocional pa e ultimo siman di Carnaval y ta p’esey e ta den e groovy soca. Si nan ta bay den e mesun estilo pa otro aña, Oliva no tabata por a bisa. Nan lo bay experimenta cu varios ritmo.
CASPER
Carnaval 69 tabata uno grandi y historico, yen di ambiente. E ta gradicido cu e pueblo di Aruba, pa acept’e como nan Rey di Soca, Artista di Aña di Carnaval, Roadjam y Radio Jam.
Su presentacion den e Caiso & Soca Monarch Contest tabata un soño cu e tabata tin, un idea cu e tabata tin y den un momento di locura, el a bay inscribi. E no a bay pa cu expectativa pa gana, pero mas bien pa participa. Nunca el a spera cu e lo gana algo, el a hacie pa e pasa pret p’e contribui na e Caiso & Soca Contest.
Casper a sigui bisa cu den e proximo lunanan e lo bay saca un of dos produccion, prome cu october ya cu segun e rumornan, Caiso & Soca Monarch Contest lo ta bay ta na october proximo. E ta sumamente gradicido, na henter su team, su famia, cu a apoy’e den e aventura aki y cu awe ta Soca Monarch. Por ultimo, el a gradici ‘NFuzion, TOB Carnival Group cu a permitie pa join nan durante e temporada di Carnaval.
STELLARIS CASINO
Si tur e lidernan di banda cera cabes hunto, esaki lo por bira un realidad.
Yazira Javois-Feliciana, Manager di Mercadeo di Stellaris Casino, tambe a felicita Jair ‘Casper’ Dijkhoff pa su titulo como Soca Monarch. E tambe a apoya e idea di DURO Entertainment di bin cu e hobennan, pa nan drenta y participa den e festival. Si tur musico cu un tempo tabata carga e corona y kier pa e festival aki sigui crece, e festival aki lo sigui crece sigur.
Segun Javois-Feliciana, no mester bagatalisa esunnan cu a bin di abou, pasobra un dia tur a bin di abou y a traha duro pa awe nan ta na halto.
Ban apoya nos hobennan, pasobra ta nan ta e futuro di nos pais y di nos Carnaval.
