Oficina Central di Estadistica e siman aki a saca cifranan di luna di mei. Un di e categorianan tabata e CPI den e periodo di mei 2023 pa mei 2024. Esaki ta mustra cu den e ultimo diesdos (12) lunanan, e CPI a subi cu 2.6%, unda nuebe (9) di e diesdos (12) sectornan a registra subida di prijs.
E subidanan cu tawata tin e mayor efecto riba e CPI a registra pa e sectornan di “Comunicacion” (18.0%), “Vivienda” (3.4%), “Restante bienes y servicio” (2.5%), “Restaurant y hotel” (5.9%), “Cuminda y bebida no-alcoholico” (2.4%), y “Educacion” (24.8%) causando un efecto di respectivamente, 1.35, 0.86, 0.30, 0.28, 0.28 y 0.24 ppt.
E subida den e restante sectornan a contribui cu un efecto di 0.10 ppt riba e CPI di mei 2023 – mei 2024. E subidanan aki a wordo contraresta parcialmente door di principalmente un caida den e indice di e sector di “Transporte” (-3.5%), cu a contribui cu un efecto di -0.51 ppt. E caidanan den e sectornan restante a contribui hunto cu un efecto di -0.28 ppt riba e CPI di mei 2023 – mei 2024.
E subida den e sector di “Comunicacion” a wordo causa door di un subida di 21.1% den e categoria “Servicio di telefon y fax”, causando un efecto di 1.49 ppt. E subida den e sector di “Vivienda” a wordo causa principalmente door di un subida di 14.8% den e categoria “Mantencion y reparacion di vivienda”, causando un efecto di 0.76 ppt. E subida den e sector di “Restante bienes y servicio” a wordo causa door di principalmente subida den e categorianan “Otro articulonan personal” (14.0%) y “Cuido personal” (3.7%), causando un efecto cada uno di 0.15 ppt.
E aumento den e sector di “Restaurant y hotel” a wordo causa principalmente door di un subida den e categoria “Cuminda pafo di cas” (4.5%), causando un efecto di 0.21 ppt. E subida den e sector di “Cuminda y bebida no-alcoholico” a wordo causa principalmente door di un subida den e categoria “Cuminda” (2.2%), causando un efecto di 0.23 ppt. E subida den e sector di “Educacion” a wordo causa door di subidanan di 42.9% y 32.0% den e categorianan “Educacion preescolar y basico” y “Educacion secundario”, causando un efecto di respectivamente 0.10 y 0.14 ppt.
Caida den e sector di “Transporte” a wordo causa pincipalmente door di un caida di 11.8% den e categoria “Compra di vehiculo”, causando un efecto di -0.61 ppt.
Canasta di consumo
Den e ultimo aña cu a pasa 56.6% di productonan den e canasta di consumo di e CPI a conoce un aumento di prijs causando un efecto di 4.63 ppt, mientras cu 36.3% ta mustra un caida di prijs, cu a contribui cu un efecto di -1.99 ppt y pa e restante 7.1% no tawata tin cambio den prijs.
E indice di “Bienes” (0.8%) a registra subida, causando un efecto di 0.47 ppt, mientras cu e indice di
“Servicionan” a registra un subida di 5.3% y a causa un efecto di 2.17 ppt.
Bestaansminimum
Den e ultimo diesdos (12) lunanan e bestaansminimum pa un hogar consistiendo di dos (2) adulto y dos (2) mucha (edad 0-15 aña) a registra un subida di Afl. 138, di Afl. 5,354 na mei 2023 pa Afl. 5,492 na mei 2024.
E subida aki a wordo causa principalmente door di subida den e sectornan di “Cuminda y bebida no
alcoholico” (Afl. 54) y “Vivienda” (Afl. 54).
Cambio di prijs di petroleo, utilidad, gasolin y diesel
E prijs promedio pa bari di petroleo a conoce un subida di US$ 8.55 (11.9%) di US$ 71.86 na mei 2023 pa US$ 80.41 na mei 2024.
E indice di Energia a subi cu 0.3% den e ultimo aña y a causa un efecto di 0.05 ppt. E indicenan di Gasolin” (0.9%) y “Diesel” (3.0%) a registra subida, causando un efecto di respectivamente 0.04 y 0.01 ppt riba e CPI.
E indicenan di “Electricidad” y “Awa” no a registra cambio. E restante 404 bienes y servicio hunto, a conoce un subida di 3.1% y tawata tin hunto un efecto di 2.58 ppt.
Cambio di prijs di Cuminda y servicio di catering
Den e ultimo diesdos (12) lunanan e indice di “Cuminda & servicio di catering” a subi cu 3.0%. E indice di “Cuminda na cas” a conoce un subida di 2.4%, unda ocho (8) di e diesun (11) indicenan di e gruponan di “Cuminda na cas” a subi durante e periodo aki.
E indice di “Sucu, jam y otro tipo di cos dushi” a conoce un subida di 10.6%, e subida mas grandi entre e gruponan di “Cuminda na cas”. Ademas otro subidanan significante a wordo registra den e indicenan di “Restante productonan pa alimentacion” (5.1%), “Bebida no-alcoholico” (4.2%), “Fruta” (3.8%), “Lechi, keshi y webo” (3.3%) y “Berdura” (3.3%).
E caida mas grandi durante e periodo aki a wordo registra den e indice di “Pisca y otro cuminda di lama” (-3.9%). E indice di “Cuminda pafo di cas” a registra un subida di 4.5% den e ultimo diesdos (12) lunanan.
