E dump di Serlimar ta keda cera mañan tambe, despues di e welga cu a tuma luga awe. Trahadonan di Serlimar ta preocupa cu nan futuro trabao, mirando cierto decisionnan cu Gobierno, of den e caso aki, Minister Otmar Oduber ta tumando, relaciona cu e asunto di sushi.
Trahadonan ta preocupa y nan a pone trabao abao den un protesta. Dump tabata cera henter dia awe y naturalmente esaki a perhudica, no solamente Serlimar mes cu mester a benta sushi, pero tambe otro companianan y otro ploegnan, cantidad di hende cu a bin cu auto, no por a subi dump.
Magali Brito di SEPPA a bay cerca Minister Otmar Oduber. El a splica cu nan a reuni cu minister y a presenta e preocupacion cu tin di parti di trahadonan. A mustra e minister cu tin informacion cu ta circula rond cu tin posibel intensionnan sea cu ta di gobierno of parlamento pa trece cambio den e ley cu ta proteha Serlimar y cu tin e intension tambe pa pasa of duna otro compania, tambe e derecho pa procesamento di sushi. Igualmente a trece preocupacion tambe cu tin rond di e cobramento di e tarifa nobo.
E minister a splica cu en todo caso di su banda, e no tin ningun intension y tampoco di gobierno pa trece ningun cambio pa debilita e compania di Serlimar. Segun e minister ta al contrario. E lo haci tur loke ta den su man pa reenforsa esaki. Pero si e minister a mustra cu berdad el a wordo yama pa un reunion cu parlamento mañan, un reunion publico, cual e mes no ta compronde kico ta e intension di e parlamentarionan tras di yamamento di e reunion aki. E ta di acuerdo cu SEPPA rond di e preocupacionnan cu tin y tambe ta comparti e preocupacionnan aki y ta spera cu durante dia di mañan, e ora ey e ora e por clarifica e otro puntonan di preocupacion cu tin.
SEPPA a mustre si cu tin tambe e duda cu na e momentonan aki, no ta tene cuenta cu diferente otro puntonan cu lo por ta buraco cu e otro companianan cu tin interesnan rond di e procesamento di sushi, cu e compania aki, despues por atende gobierno dilanti corte y gana tur otro derecho.
Den pasado tabata tin discusion cu e diferente gobiernonan, gobierno di MEP, pero tambe gobierno di AVP, na unda cu e ministernan e tempo ey a trece e preocupacion rond di loke ta yama unfair competition. Akinan, segun e minister no. E preocupacion di esaki no mester ta existi, pasobra tin diferente decisionnan di hues cu ta proteha Serlimar.
Esakinan ta puntonan cu e ta trece. Mescos ta keda e parti di cobramento di tarifa. Segun e minister e tin un ley cu ta duna Serlimar e derecho unicamente pa por cobra. Pa e motibo ey e lo haci’e tambe cu tur cas aki na Aruba, cu lo mester bay paga un tarifa. E suma aki, el a discuti’e cu tres sindicato, of tres grupo, di cual eynan SEPPA a mustr’e, cu e forma cu el a atende esaki no ta e forma di mas corecto. Den pasado tur asunto tabat wordo discuti, sea den dialogo social, dialogo nacional, ki nomber cu kier pone, pero e tabata bay wordo discuti cu e diferente partnernan social, gremionan comercial, etc., pa asina tur hende por duna nan imput y na final un decision cu ta wordo carga, tur hende por carga esaki y no na e forma cu el a bay awor aki. Apenas riba un diabierna, dia dia prome cu e ta drenta na vigor, ta lansa e bom aki pa comunidad y cu a crea tur e mal contento cu tin na e momentonan aki.
Esakinan ta e informacion cu el a trece. SEPPA a mustre cu tur punto cu el a trece, apesar cu el a duna di su banda, ainda no a keda mucho cla pa SEPPA kico ta e intensionnan pa cu Serlimar. No ta compronde kico lo bay sosode. Sa y ta pensa cu posiblemente lo por bin mocionnan dilanti y no sa si e mocionnan aki por trece cualkier posicion di Serlimar na peliger y esey lo keda vigila. Pero tanten cu no tin claridad pa e trahadornan, e trahadornan lo keda den accion di welga.
Diaheubs
Esey ta nifica cu durante dia di diahuebs, lo no tin servicio atrobe na dump y ta kere tambe cu e trahadornan lo keda en espera di e resultado di e reunion publico cu tin na parlamento.
No ta riba e mesun liña
Algo mester sosode cu Serlimar si. Mester mehora su servicio bastante. Ta kere cu tin hopi cos pa mehora. Ta kere cu Serlimar mester tin inversion, mester haci mas inversion den esaki, pa e por brinda un miho servicio. Tambe sa y segun Brito, den e ultimo dos añanan, cu tabata tin e discusion y cu e minister di e tempo ey, unda cu a yega na un protocol, tambe a trece padilanti cu ta tumando nota di parti di Serlimar, no ta cumpliendo cu e traspaso di placanan di por ehempel loonbelasting, AZV, AOV y di acuerdo cu administracion di Serlimar, cu gobierno debe placa. Y e tempo ey caba a urgi gobierno pa e fondonan wordo poni disponibel pa asina por percura pa e servicionan ey continua. No por sigui asina. E trahador mañan por hay’e den problema.
Kico lo sosode.
E ta keda un preocupacion di e trahadornan. E minister ta priminti di cumpli. E ta priminti cu dado caso Serlimar ta bay over na cobra un cierto suma pa recogemento di sushi. E lo tin mas fondo disponibel tambe pa cumpli cu tur e obligacionnan cu Serlimar mester por tin.
Sosten
E Parlamentarionan ta tuma nota cu tin preocupacion den comunidad. Nan tin cu sali padilanti pa un comunidad. Tin parlamentario a haci declaracion cu ta bisa cu a pone placa disponibel netamente pa cubri 2018, na unda e ora no mester cobra un suma. Di un otro banda e minister ta bisa cu di su banda el a haci e peticion na Parlamento, bin cu un presupuesto mas completo, pa percura pa entre otro sumanan di placa cu no tabata wordo traspasa pa impuesto pa ba sosode awor aki si. E claridad ey mester por tin. E no por ta asina cu parlamento ta pone un suma disponibel pa algo, y a bin resulta cu ta pa algo otro. Di e forma aki no por atende cu fondonan publico.
Di un otro banda, e ora ey mester bin duidelijk berdad. Ta kere den socialisacion den tarifa, pero e mester ta duidelijk a base di kico a yega na cierto sumanan. Tin hopi grito cu e sumanan ta hopi halto y si e ta halto of poco, SEPPA en todo caso no por contesta. Nan no tabata envolvi den e discusion y di e manera abrupto cu tur cos a bay SEPPA ta kere cu esey tabata e manera di mas corecto.
