Departamento di Salud Publico (DVG) ta sigui tur instancia y companianan farmaceutico, universidad y laboratorionan, pa busca mas pronto cu ta posibel un solucion definitivo pa e prevencion di e malesa COVID-19, cu a causa un pandemia grandi cu perdida humano, financiero, entre otro, rond mundo.
Segun dr. Wilmer Salazar, medico microbiologo y medico consehero di Salud Publico, a splica cu e compania Pfizer a duna mundialmente informacion cu nan ta den un fase tres di nan vacuna y cu tin un efectividad por lo menos di 90%, of un tiki mas.
Esey ta aparentemente duna un garantia cu e vacuna lo por traha sin efecto negativo, pa por preveni esnan cu ta haya e vacuna aki, por haya of por lo menos duna masha poco sintoma di COVID.
Te awor aki, tin por lo menos 45 vacuna cu ta trahando riba nan. Mayoria di nan ta di mecanismonan di accion y e vacuna aki, hunto cu algun otro compania, tambe ta den fase tres. Esey ta nifica cu nan ta haci un estudio multicentrico cerca un gran cantidad di hende, unda cu ta aplica e vacuna y cerca otro grupo un placebo (cu no tin nada di remedi aden), pa compara cu en berdad e vacuna ta proteha contra e infeccion pa Coronavirus.
E cantidad ta substancial. Tin varios pais cu ta haciendo e trial aki pa despues nan por yega na un conclusion definitivo cu entre otro e vacuna ta totalmente efectivo y cu e ta safe, cual ta hopi importante.
Tambe e vacuna, unabes cu aplik’e, no lo mester bay tin consecuencia pa salud di hende. Unabes cu finalisa e parti aki, fase tres, lo bin e produccion y distribuicion pa un tempo mas of menos determina, y vigila si e tin efectonan indesea den e periodo despues di a aplik’e.
Efectonan di vacuna
Dr. Salazar a expresa cu vacuna ta pa preveni cierto malesanan. Instancianan internacional di salud ta garantisa cu un vacuna no por sali pa haci daño, sino mas bien e mester ta un beneficio. Ta pone den balansa loke ta beneficio di un vacuna contra su efecto adverso y ta wak si di berdad e ta traha of no.
Esey ta un punto semper di e parti preventivo. Prevencion ta e miho forma y un di e miho formanan ta vacuna.
Pakico
Un vacuna ta tuma hopi tempo di estudio, y e no ta algo cu ta traha traha di un dia pa otro. Ta haci hopi estudio, pa wak si e por tin su efecto protector y ademas di esey, e contenido di e vacuna mester garantisa cu un gran porcentahe di hende no lo bay tin efectonan adverso of por tin efectonan indesea. E mester brinda proteccion.
Dr. Salazar tin hopi confiansa den e parti aki. DVG, hunto cu tur otro instancia cu ta traha den e parti di salud, tin e mesun un punto di bista. Awor aki ta warda pa caba cu e testnan aki cu ta pa mas of menos tres siman, pa despues bin e parti di produccion y aplicacion y por tin un efecto yena di speransa pa nos comunidad y pa henter mundo y cu despues por sali for di e pandemia aki.
Expectativa
Instancianan mas ariba di parti di salud, Ministerio di Salud Publico y esnan cu ta yuda, mester elabora riba e expectativa di un vacuna. Mester planifica. Cuanto tempo por warda pa e vacuna, y cual ta su efecto. Na ken mester aplik’e tambe. Mester bin cu tur e sistema ey y Dr. Salazar a indica cu ta traha awo riba esaki. Por corda riba e experiencia di Swine Flu, caminda cu a traha riba e vacuna, tambe a traha un eskema di aplicacion di vacuna cu a bay bon. Ta mescos pa esaki. Prioridad ta pa esnan cu tin un riesgo halto, cu lo ta e promenan cu lo haya e vacuna. Esnan cu por proteha mas tanto y cu ta haya mas complicacion, severidad y morto. Esey ta e prome parti cu mester haci y despues ta bin mas.
Afortunadamente nos poblacion ta chikito. Un porcentahe tin risico di complicacion di e vacuna, pero no ta asina hopi.
Den e proximo dianan mester tin tur plan aki pa ora cu e vacuna di Pfizer ta comercialisa y distribui na esnan cu a solicit’a pe.
E parti di efecto toxico y adverso ta hopi abao y parce cu e vacuna ta basta sigur y basta activo. Dos componente necesario pa por tene e confiansa y siguridad, cu e vacuna no lo bay tin complicacion. Al contrario, nos lo ta proteha pa COVID.
