Departamento di Progreso Laboral (DPL) den cooperacion cu Renaissance Resort & Casino, ta traha den un forma strategico. Nan ta convenci cu trahando hunto por logra cosnan grandi pa nos pais.
Segun Lionel Croes, di e ekipo di PR di e departamento, e rol di DPL ta keda uno importante bao di Ministerio di Asuntonan Social y Labor, caminda cu ta enfatisa y keda enfoca riba e ser humano. Ta convenci tambe cu e relacion nobo cu ta creando cu partnernan strategico, ta bay brinda beneficionan sumamente faborabel pa e buscado di trabao y como tambe pa e dunado di trabao.
Den e caso aki ta aplaudi tambe Renaissance Resort, cu siguramente ta un cadena di hotel hopi prestigioso di renombre na Aruba y internacionalmente tambe. Pa DPL ta un privilegio di por forma parti.
DPL ta convenci cu e relacion aki cu ta creando cu Renaissance por habri portanan tambe pa otro hotelnan, otro instancianan, companianan den tur sector, pa acerca DPL.
DPL tambe di su parti ta trahando caba den un forma dinamico. Nan ta haciendo hopi trabao diferente aworaki pa mehora, no solamente e calidad di servicio, pero ta kere tambe den mehoracion, den relacion cu e dunadonan di trabao. Ta creando un relacion nobo y ta kere cu esaki siguramente, mirando e di dos cliente cu nan ta lansando den poco tempo, caminda cu a lansa primeramente Aruba Aloe Balm y awo a lansa e campaña cu Renaissance.
DPL ta sumamente contento y gradicido na e oportunidad aki cu por haya di parti di Renaissane Resort & Casino.
Kico por haci pa aplica
Segun Croes, e trabao ta room attendant, pa forma parti di e departamento di Housekeeping. A crea awor aki un jobapplication riba e pagina di Facebook di DPL. Por sigui nan riba e pagina aki, like pagina. Bo por traha bo afspraak, haya informacion mesora riba e pagina y por yena e aplicacion aki, cu ta haci’e un herment hopi faborabel y practico pa di e forma ey por comunica cu DPL.
Tambe por traha cita riba nan pagina di Facebook. Y si ta walk in, por pasa entre 7.30 y 11.30 di mainta na e oficina principal di DPL na Sero Blanco.
Ta bay pone tambe na disposicion, di tur esnan cu ta biba p’ariba di brug, pa por bay tambe haci nan registracion na San Nicolas mes.
E informacion aki lo difundi diabierna mainta, cual lo sali riba nan pagina di Facebook. Aki por haya tur informacion di aplicacion pa tur esnan cu kier registra na San Nicolas.
Si mira tur e beneficionan cu e compania ta ofrece, ta algo sigur di elogia, segun Croes. E ta algo bunita y no ta beneficionan cu ta scucha tur ora. A enfoca riba e beneficionan. Loke ta bunita di e compania aki ta, cu bo por crece cun’e. Puntonan cu a resalta ta cu nan ta dispuesto pa inverti den e educacion, inverti den crecemento di e ser humano. Esaki awendia ta di aplaudi y DPL kier encurasha tambe tur esnan cu no tin trabao y tin gana di progresa, esaki ta un oportunidad unico pa por aplica pa e posicion aki.
No mester lubida pa acerca DPL, bin na e punto di registracion di DPL, sea cu bo ta bin personalmente of comunica via e pagina di Facebook y ricibi tur instruccion necesario.
