Mientras cu na Aruba no sa mucho cos ainda di e curpanan haya na costa nort di Aruba, na Venezuela a publica caba identidad di dos victima femenino.
Un informe publica den Cactus24, ta menciona na e bario Las Cumaraguas, di e municipio di Falcon, e hendenan ta di luto. Hallazgo di al menos tres curpa na e costa di Vader Piet, ta demostra un biaha mas cu e biahe di 27 miya for di e peninsula di Paraguana pa e isla ta manera un sorteo di bida of morto pa e inmigracionnan cu asina mes, ta core e riesgo, poniendo nan bida den man di organisacionnan dedica na transporte di persona.
Como cu ta trata di biahenan clandestino y ilegal, tras di lomba di autoridadnan Venezolano y di esunnan di Aruba, ta poco e informacion oficial cu por haya di e naufragio aki. No tin un control di esunnan cu a bay ni e lista di pasahero. Sinembargo asina cu e bos a cuminsa core di e ultimo biahenan cu a tuma luga.
Asina e medio a recoge informacion cu tanto riba diasabra como diadomingo tabatin barkitonan cu a sali rumbo pa Aruba.
Algun version extraoficial ta indica cu diasabra un lancha cu persona a Sali for di El hato, Santa Rita y otro comunidadnan den cercania, pero no a haya informe actual di e nave. Otro tres lancha a sali diadomingo for di e zona di Tumatey pero debi na mal tempo, dos di nan a bolbe y un a sigui. Probablemente esaki lo ta e nave naufragia.
Den e bario di Las Cumaraguas mesora a cuminsa circula potret di e dosnan cu lo ta e inmigrantenan aki, esta Alexandra Lugo y e otro, María Virginia Martínez, lider di caya di municipio Falcón, y ambos tin yiunan cu di e forma aki ta keda huerfano.
