José H. Potenza Pérez nunca a drumi pensa cu su soño lo bira un fierno aki na Aruba. Durante cu e tabata bayendo cu pensioen 14 aña pasa, el a dicidi cu e kier keda bin Aruba cu regularidad ya cu pa mas cu 30 aña e cu su famia a bin Aruba cu vakantie y tabata stima e isla pa nos cultura, seguridad riba caya y respet cu hendenan tin pa otro y tambe pa ley.
Nan a bishita Acqua Condominiums e tempo ey cu pa nan tabata mane un soño cu a bira realidad. Na a cumpra dos apartement, uno pa su famia y un pa e famia di su yiu. Pa haci e inversion aki posibel el a hinca tur su placa cu el a spaar den transcurso di añanan. Y esaki ta conta pa su yiu tambe. E tempo ey nan a considera esaki un inversion safe pa hinca nan placa aden.
Bintidos aña despues e fierno ta cuminsa
Dia 22 di juli 2022 e famia ta haya un carta den cual ta informa nan cu Acqua Condomiums a bira Radisson Blue Aruba. Esaki a pone nan cabeynan rijs ya cu ningun momento nan a haya niun tipo di informacion riba e cambio aki unda cu e lugar ya no no tabata un compleho di apartement mas sino a bira un hotel. Nan ta inversionista y nan tabatin un contract di compra venta y nunca a haya ningun informacion riba e cambionan aki cu lo tin su efecto riba nan tambe. Nan a haya nan mes ta hinca nan curpa den mas gasto ya cu nan mester a busca un abogado pa defende nan. Durante dos aña no tabata posibel pa nan bishita nos isla door di pandemia y tambe e situacion politico di Venezuela. November 2022 nan a dicidi di bin Aruba ya cu nan no tabata haya ningun contesta riba e corespondencia cu nan tabata manda.
Contract original ta cambia completamente
Den un entrevista cu e redaccion di 24Ora.com José H. Potenza Pérez ta splica cu na momento cu nan a yega Aruba nan a haya nan cu e sorpresa desagradabel cu Radisson Blue Aruba ta bisanan pa nan tuma contacto cu nan abogado. Entretanto Acqua Condomiums tabata funciona como Radisson Blue Aruba. Segun e señora cu a yuda nan na balie, E president nobo Herman Giraldo no tabata disponible pa papia cu nan e momento ey. Nan a dura un siman prome cu el a duna nan cara y papia cu nan. Nan a logra reuni si cu e abogadonan di Radisson Blue Aruba y e abogado a bisa nan cu nan lo mester firma un addendum den e contract den cual nan ta renuncia tur derecho cu nan tabatin den e contract bieu y asina Radisson lo duna nan acceso pa nan apartementnan. Esaki tabata un sla duro pa e famia. Nan no ta reconoce e Aruba cu nan a namora di dje mas di 44 aña pasa. E famia a nenga di firma e addendum den e contract y nan no tin plan pa bai firma esaki tampoco. Loke ta preocupa nan ta kico ta para di nan propiedad cu nan apaga p’e. Nan a purba di bende nan propiedad pero nan mester firma cu Radisson Blue Aruba ta haya tur derecho pa administra nan propiedad y tambe nan ta obliga di cumpra tur mueble cu tin den e apartementnan y di e bebeficionan nan lo haya solamente 38% mientras cu nan lo mester keda tur gasto di servicio y esaki ta perdida so pa e famia ya cu nan lo por saca nan gastonan bek pero den 4 aña y ya José tin 79 aña di edad y ta mira su futuro scur pa por saca su placa bek.
