Den Lucas capitulo 4:1-13 diabel ta tira asalto riba Cristo Hesus, y nos ta mira con na prome luga con dominio propio ta domina , pasobra Hesus tabata yena cu Spirito Santo.
Den Galationan 5:22 nos ta siña cu Dominio Propio ta un fruta di Spirito Santo cual ta resalta den bida di hende ora nan entrega nan bida na Hesus Cristo y biba pa Hesus Cristo.
E ta algo masha importante den nos bida, pasobra eynan nos ta mira claramente con e temor di Dios ta manifesta den bida di hende.
Hende cu no ta reconoce Cristo Hesus como rey y Señor den nan bida, no tin dominio propio, pasobra nan mes kier hiba un bida manera nan kier biba.
Pero tur dia ta keda notabel cuando necesidad di Dominio Propio un hende por tin den su bida.
Un hende cu no tin dominio propio den su bida sexual, su bida sexual no tin control, pasobra e mes no tin control, pasobra e Spirito di Dios no ta guiando su bida.
Un hende cu no tin dominio propio den su bida financiero , kier biba un bida mas halto cu su ingreso, y esey ta trece struggle constantemente.
Un hende cu no tin domino propio riba su boca, ta papia, pa papia y ta haya su mes envolvi den tur tipo di redo y payasada.
Pa falta di dominio propio tin hopi accidente riba caya, hopi di nan ta laga atras hende cu daño fisico serio, casi nunca ta wordo raporta, solamente ora e accidente ta fatal e ta wordo publica.
Uzo di alcohol, ta pone hende perde dominio propio den trafico, pasobra n’e momento cu tin hopi alcohol den bo curpa, bo dominio propio ta baha, hunto cu bo reaccion y bo ta reacciona laat. P’esey tin tanto rotonde y palo di luz cu diariamente ta wordo alcansa.
Hende ta resulta te den prison pa falta di dominio propio ya cu nan ta recuri na inmoralidad y violencia, cu tur consecuencia.
Hopi matrimonio ta wordo kibra pa falta di dominio propio, di hende cu no por wanta nan mes na solamente un solo homber of un solo muhe.
Dominio propio den sistema moderno nos ta yam’e selfcontrol, pero sin Presencia di Spirito Santo den nos bida, nos dominio propio ta hopi abao.
Hende ta tenta Dios y hinca nan mes den situacion dificil y bay den extremo cu ta solamente Dios por saca nan.
Tur hende mester tin dominio propio, un hende por ta hopi sabi cu hopi diploma, titulo, posicion pa eherce un trabao, pero pa falta di dominio propio nan ta perde e trabao, perde nan integridad cu ta solamente Cristo Hesus por restaura nan bida.
A yega tempo pa tur hende reconoce, cu un bida sin Dios, ta hiba na un bida sin dominio propio.
Y e enemigo ta wak tur momento pa haci daño, pasobra el a bin pa horta, mata y destrui.
Si nos wak bon den Lucas 4:1-13, e enemigo a acerca Hesus sin ningun clase di respet, bisando cu “si bo ta Yiu di Dios,” esey ta nifica cu e ta duda, aunke un rato prome Dios mes a bisa cu Hesus ta su Yiu stima den cual e tin goso. (Lucas 3:22)
Awendia nos tin cu tene bon cuenta, pasobra enemigo ta bira dia pa dia mas sushi, y e kier haci tur locual posibel pa trece duda den bida di hende, y asina nos dominio propio ta core peliger.
Pesey nos bida di oracion ta hopi importante.
Sinceramente, Pastoor Marcel Balootje
