E grupo di Dominicanos Unidos en Aruba ta hopi disgusta cu nan Consul na Aruba. Pa tal motibo a dicidi di forma un grupo y bay na sede di Consulado den Julianastraat pa mustra nan malcontento. Vocero di e grupo, Ramon Valdez, a duna un splicacion amplio di a motibo cu nan pasenshi a caba.
A entrega un documento cu shete punto pidiendo atencion pa nan preocupacionnan of cumpli cu e exigencia di e Dominicanonan na Aruba.
Asina por ehempel e Consul no ta presente pa atende cu problemanan di e colonia Dominicano. El a sali di e isla for di dia 5 di december y a bolbe dia 26 di februari pa e acto protocolar di dia 27 di februari. El a biaha atrobe dia 29 di februari y no a bolbe ainda.
Na e Consultado ta registra 10 persona di e oficina, di cual 8 no ta trahando na e sede consular, pero ta cobrando un suma di 2500 dollar mensualmente, y sin traha.
Ora cu nan ta mester por ehempel renoba nan paspoort, esaki tin biaha ta dura hasta 6 luna, siendo cu e ta algo cu mester wordo haci den un luna.
A priminti di manda un tecnico di Hunta Central Electoral pa yuda den loke ta e proceso di renobacion di cedula y otro actanan pega na e consulado. No mester lubida, nan ta bisa, cu tin mas cu 7 mil Dominicano bibando riba e isla y Consulado no ta cumpliendo cu nan.
Nan ta bisa tambe con Consulado no ta dunando atencion na luga cu a haya for di Gobierno di Aruba, cu ta manera den mal estado. Nan ta pidi pa drecha y embeyece loke ta Plaza de la Bandera Juan Pablo Duarte.
E grupo ta exigi pa e Consulado duna atencion na e residente Dominicano cu mester di nan, manera den caso di personanan cu haya problema legal, duna nan un tipo di conseho di e caminda cu nan mester cana. E por ta tambe relaciona cu asuntonan di salud.
Nan kier contesta riba maneho di e presupuesto asigna pa e sede, nan kier sa kico ta haciendo cu e placa di ciudadanonan Dominicano, mirando cu nan no ta ricibiendo e servicio necesario. Al contrario, nan tin un servicio pesimo y atencion desagradabel.
Pa tal motibo, nan ta pidi pa retira e actual consul general Dominicano na Aruba.
