Diabierna anochi a sosode un caso peculiar caminda trucknan pisa tabata raspa y plama santo rib’e beach dilanti Divi Resort riba e strip di low rise. Ta un situacion cu antes tabata masha normal pa haci pero locual ta hacie interesante ta e echo e minister di naturalesa ta haci masha dificil pa otorga un permiso pa Embassy Suites construi un beach cu no t’ey actualmente pa motibo di algun yerba di caña. Di otro banda, e beach cerca di Divi tin movecion pisa tumando luga e minister no a activa ainda.
Mr. dr. Ryçond Santos do Nascimento ta parlamentario parlamentario independiente, el a nota e movecion aki y a yega mesora n’e sitio. “E naturalesa por papia pa su mes? No toch, ken ta bay papia na nomber di naturalesa? Greg Peterson, esey t’e maneho di Ursell Arends”, asina do Nascimento a cuminsa bisando durante un entrevista cu 24ora.com n’e beach dilanti di Divi.
Los di e echo di e parti legal, ta mira cu e beachnan mester di mantencion. Ora no hacie, e ta crea un peliger pa turismo y tur cu ta haci uzo di e beach. Pero ta obvio cu gobierno no ta haci su trabou na drechi. Ora sigui core riba e strip di J. E. Irausquin Boulevard, ta haya un holor fuerte cu ta casi ta mata bo, e parlamentario a vocifera. Dicon DOW no ta haciendo e trabounan aki? Dicon ta compania priva ta riba e beach? Ta preguntanan cu do Nascimento ta puntra na direccion di e parlamentario. Ta mustra claramente cu nos beachnan ta artificial, mirando cu tin cu basha santo y haci comosifuera ta beach propio. MEP y RAIZ ta contradici otro, pero asina mes ta lapi e gobernacion. E maneho di Ursell Arends ta “ lapi lapi”, e parlamentario a vocifera. E minister no a bin cu ningun ley pa cu naturalesa riba nos isla. E ta un situacion di atencion pero ta claro cu e minister no ta capas di atende cu ne.
