Un habitante di Paradera a lubida su auto habri pa 10 minuut y net e momento ey Koki tabata canando den area. El a pasa check su auto y a hay’e habri y a coba den dje. El a horta 350 florin for di cartera di e habitante. Polis a laga Koki bay, pero e persona no a haya su placa bek. Loke Koki a haci ta yama su mama pa paga e persona bek cu un areglo di pago.
Elton Kock, conoci como Koki, ta hopi conoci den e districto di Paradera y e bario di Piedra Plat pa tur loke e ta haci. E ta un persona cu tin e area terorisa. Na diferente ocasion el a bay cera pa su actonan di ladronicia, pero door cu su strafkaart no ta marca hopi, Polis no por haci nada.
Polis a bisa awe cu no tin suficiente caso y prueba contra Koki cu ta stroba e proceso pa Hues por pone bou curatela pa oblig’e drecha bida. El a bay cera algun biaha caba, pero asina cu e ta afo tur hende ta pendiente di su paradero. E ta cana den henter e bisindario buscando pa horta. No ta prome biaha cu e ta drenta den casnan y den algun caso hasta dos biaha caba!
Den december el a horta un celular y a entrega keho contra dje, pero door di no por a mira bon si ta Koki of no, Polis no por a haci mucho.
Esnan den bario kier mira un solucion p’e situacion di Koki. Unda su famia a keda pa brinda Koki a yudansa cu e mester? Unda e instancianan concerni ta? Polis no por haci nada. Hues mes no kier manda Koki bou curatela y tur pasobra no tin suficiente denuncia contra dje. Anochi prome cu lock cas bon, tin cu cana rond di cas, check auto ta bon cera, pasobra niun hende sa na ki momento Koki ta pasa horta. E no ta worry cu nada y ta pasa horta sea mainta, merdia, atardi, anochi of den marduga. A gar’e ta horta via camera, pero ni asina ta suficiente p’e bay cera pa largo.
Districto di Paradera y e bario di Piedra Plat y bisindario no sa mas con pa defende nan mes contra Koki. Esunnan cu conoce Koki di mucha hopi biaha ta papia cu ne. Ta dun’e conseho pa e cambia su bida, p’e rehabilita, pero e no kier tende. P’esey esnan di bario ta pidiendo e famia di Koki pa haci algo, pa Hues duna ordo p’e bay bou curatela y mand’e den un instancia p’e rehabilita.
