Manera ta conoce, dialuna mainta Prome Minister di Hulanda, Mark Rutte a brinda un disculpa oficial pa e rol cu e pais a hunga den sclavitud na Aruba, como otro paisnan den reino Hulandes. Antropologo y docente di universidad, Luc Alofs, a sigui e discurso aki di cerca durante e encuentro cu a tene na Aruba. Alofs ta un historiador cu varios buki riba nos isla. Basa riba su conocemento,el a comparti su impresion di e nificacion y importancia di e momento aki.
El a cuminsa na indica cu sigur ta un dia historico, pa hopi motibo. Ta prome biaha cu Hulanda, como colonisado, como pais cu a facilita sclavitud, cu a legitima sclavitud y cu a haci ganashi for di sclavitud; ta bisa: ‘sorry’. Door di bisa esey, Hulanda ta reconoce y pidi pordon. E ta nifica cu, e rond di 500 Arubiano cu a biba den sclavitud, oficialmente a haya nan libertad bek.
Otro aspecto, segun e academico, ta nos idioma Papiamento. Alofs ta splica cu Hulandes semper a wak sclavitud, y nos idioma Papiamento, como algo Africano; un idioma di catibo. E ta contento cu Premier Rutte a menciona den su palabra cu hopi biaha nos no ta reconoce nos tradicionnan Africano pasobra nan ta Africano y cu esey ta un tipo di racismo. Tanto Rutte, como Secretario di Estado di Justicia y Siguridad, Eric van der Burg a reconoce cu sclavitud tabata algo malo, pero cu discriminacion y racismo ta biba ta presente ainda.
Pa e relato completo, lesa edicion di TREMPAN
