Tin hopi keho encuanto e subsidio di salario, e forma cu ta cobra e hendenan y cobransa di esaki bek. Tur cos ta bay segun e decreto di Subsidio di Salario pero hopi hende no ta lesa cual ta e condicionnan y e reclamonan ta cuminsa ora cu empresanan mester cuminsa paga bek loke cu nan a haya.
Director di SVb ir. Edwin Jacobs a splica cu subsidio di salario ta algo cu ta regla den un ley aproba y publica dia 13 di mei. Esaki a bini for di ministerio di finanza. E ta regla henter e procedura di subsidio di salario.
Ta otorga e subsidio aki basa riba salarionan sigura na SVb dia 15 di maart y e perdida di benta cu e persona ta sufri den e luna corespondiente na e subsidio. E prome condicion ta facil pa hay’e pero e perdida di benta di un luna no sa adelanta loke e ta. P’esey ora cu e doño di trabou ta bay haci e peticion pa e subsidio, e tin cu duna un calculo di loke e ta kere ta su perdida na benta.
A base di esey SVb ta calcula un suma provisional di loke ta otorgue na subsidio. E ta haya un adelanto riba su subsidio definitivo. Despues, ora cu e declara su BBO, ta haci un comparacion (basa riba articulo 9 di e decreto ministerial di subsidio di salario). A base di esey ta bay calcula si tin perdida of ganashi.
Pa calcula BBO, Jacobs a bisa, tin dos sistema cu por uza, pero e comerciante mester informa Departamento di Impuesto cual sistema e ta uza. Un ta e sistema di transaccion of e otro ta sistema di caha. E prome ta factura den un luna e benta y ta papa BBO riba loke a factura. Tin biaha no a ricibi e entrada ey ainda, pasobra no ta tur hende a paga. E sistema di caha ta esun cu e luna cu bo ricibi pago di e recibo, e momento ey ta paga BBO riba dje.
Na momento cu e dunado di trabou haci peticion di subsidio di salario, mester tene cuenta ki tipo di sistema el a scoge pa paga su BBO.
Despues SVb ta determina si el a perde benta of no; si a perde menos cu 25% di benta, no ta bini na remarca pa subsidio di salario. Awo ta sacando luna di mei y juni, wak si e cifra ta cuadra di entrada / perdida y cu e subsidio di salario duna. Si no ta di acuerdo cu e decision, por manda obheccion y mester manda esaki cu documentonan necesario, ta e declaracionnan di BBO di aña pasa mei y juni y esnan e mesun luna di 2020. Di e forma aki por haci e calculonan.
Jacobs a splica cu un problema den mundo comercial ta cu no ta lesa debidamente tur documento, unda ta duna splicacion riba ayudonan cu ta otorga y e condicionnan.
