E Chief Executive Officer (CEO) di Digicel Group, esta Alex Matuschka von Greiffenclau, a fayece repentinamente mientras e tabata cu vakantie cu su famia na su pais natal, Alemania. “No tin palabra cu por expresa adecuadamente nos tristesa cu e fayecimento di Alex of nos gratitud di por a traha cun’e”, asina Denis O’Brien, Presidente di e compania a bisa den un email na tur empleado di Digicel. O’Brien a asumi e funcion atrobe di CEO temporalmente, despues di fayecimento di van Greiffenclau ayera.
Digicel a perde un CEO comprometi y excepcional.
E CEO di apenas 47 aña di edad a join Digicel cu su sede na Jamaica, na luna di februari ultimo y tabata un figura clave den e negociacionnan di e grupo cu accionistanan pa lunanan largo riba un refinanciamento di un debe, cual a conclui siman pasa.
![](https://24ora.com/wp-content/uploads/2018/12/5CC82378-4DC6-48F4-9D0D-BABD38F9B121.png)
Von Greiffenclau, kende tabata sucesor di Colm Delves, a join e grupo for di e compania Veon di Hulanda, cu anteriormente tabata conoci como VimpelCom. Prome cu esey, el a fungi como Senior Executive na Nokia di Finlandia.
E ehecutivo a laga atras su casa Julia y tres yiu adolescente. No tabatin mas detaye disponibel awe atardi.
![](https://24ora.com/wp-content/uploads/2018/12/2C8B61AA-92D5-40C1-82DB-E7123F0D3C3E.png)
“Esunnan cu tabatin e suerte suficiente pa conoce riba nivel personal, a perde un bon amigo,” Denis O’Brien a bisa. “Durante e proximo dianan, nos lo comparti den nos pensamento pa un conmemoracion apropia pa Alex y su enorme contribucion na e transformacion di Digicel.