*Den e buki di Jeremias capitulo 31:3 ta para scirbi: Mi a stima bo cu un amor eterno p’esey cu mi misericordia mi a hala bo.
E amor di Dios t’asina grandi pa nos, asina bunita, incomprendibel, pero alcansabel pa nos tur.
Señor ta bisa den Mateo 11:28: Bin cerca mi tur cu ta cansa y carga y lo mi duna boso sosiego.
Pasobra Señor conoce e necesidad y debilidad di hende, y tambe tur obstaculo, trampa y distraicion cu e enemigo ta bini cu ne.
Nos ta bibando den un tempo caminda respet y moral ta bayendo hopi atras, en bes di hende hala cerca Dios, dia pa dia hende ta stima scuridad , y hala leu for di Dios, pero toch Dios ta tene misericordia y ta keda stima hende.
Si nos tene cuenta cu e rechaso di Dios, Su boluntad, Su principio, y Su Palabra, nos ta bini na e comprendemento cu su amor ta eterno pa nos tur.
Pasobra ora Dios a manda su unico Yiu pa muri pa nos tur , e no haci ningun distincion di persona, E a mand’e pa tur cu kere den dj’E alcansa bida eterna, Dios no tin faborito.
E palabra di Dios ta bisa nos: Como cu Cristo a sufri den carni,boso arma boso mes tambe cu e mesun proposito , pasobra esun cu a sufri den carni a kibra cu pica,pa e no biba mas e tempo cu ta rest’e ainda den carni, conforme e pasionnan di hende, sino conforme e boluntad di Dios.( 1Pedro 4:1-2).
Señor no ta tarda cu Su promesa, manera algun tin esaki como tardansa,Ma E tin pasenshi pa cu boso,y no kier pa ningun hende bay perdi, ma pa tur bini na repentimento.( 2 Pedro 3:9).
Cada momento den bida cu un hende pasa sin reconoce Cristo Hesus como su Señor y Salbador, ta un momento di peligro, pasobra e palabra di Dios ta bisa cu e binida di Cristo Hesus lo ta manera un ladron den anochi.
Ta tur hende tin mesun oportunidad, ta pa tur hende Cristo a muri na cruz di Calvario, pero capricho y duresa di curason, y no lubida riba e atraccionnan di mundo tin hende aparta for di Cristo Hesus, pero no lubida locual Juan 3:16 ta bisa y locual Juan 3:36 ta proclama.
Tempo ta trabahoso, e dianan ta dificil, e manifestacion di diabel ta bisto, y lo e bira mas fuerte, pasobra e diabel sa cu su dianan ta conta, y cu pronto Cristo lo regresa pa pone un fin na tur inmoralidad y y bagamunderia, cual e ta trastorna mundo cu ne.
P’esey esey e palabra di Dios ta recorda nos: Si boso a wordo lanta cu Cristo, anto sigui busca e cosnan di ariba, caminda Cristo ta, sinta na man drechi di e Tata . Tene boso mente riba e cosnan di ariba, y no riba e cosnan cu ta riba tera. Pasobra boso a muri y boso bida ta scondi den Cristo cu Cristo den Dios.
Señor ta duna na tur esnan cu ta kere den dj’E un cobertura dobel cu ta bini solamente y exclusivamente di Dios, ora nos sa cu nos bida ta scondi cu Cristo den Dios.
Mirando cada dia con peligroso, y malo e mundo ta birando, laga nos core duro, y acerca e trono di gracia, pa nos por haya pronto auxilio y ayudo na tempo, pasobra e dianan ta cortico.
Laga nos recorda tur hende cu Dios den su inmenso amor no kier pa ningun hende bay perdi.
Sinceramente, Pastoor Marcel Balootje.
