Orguyo y arogancia, sabiduria mundano, ciencia y tecnologia, a pone cu hopi hende ta kere cu nan por sostene nan mes. Y mas cu tur cos e engaño di placa, rikesa y poder, a lanta un locura den hende, cual ta pone nan perde respet pa Dios y su poder y ta kere den nan mes.
Pero tur esunnan cu a kere of ta kere cu nan ta grandi y cu nan tin poder, y cu no tin mester di Dios pasobra nan tin tur cos, a termina na malo, of a wordo destrui, of hiba na cama di malesa te ora morto a presenta. Ta hopi nomber por wordo menciona, pasobra keto bay tin hende ta purba, sin mira e resultado di esnan cu a bay prome cu nan.
Pero awor OJO, wak bo caya, wak bo hogar, pa abo no cay den e trampa diabolico aki, di pensa cu abo ta cla,y cu bo no tin mester di Dios, cuidao cu aparta di Dios, no laga nada aparta bo for di e caminda di Dios, pasobra ta Dios ta sostene tur cos.
Rey David a bisa den Salmo 121 vers 1+2 ; Mi ta halsa mi wowonan na e serunan for di unda mi yudansa ta bini? Mi yudansa ta bini for di Señor kende a traha cielo y tera.
David a nota como gobernante cu ta Señor ta sostene, p’esey den tur cos cu David a consulta Dios e a sali David di bon.
Rey Salomon a pidi sabiduria prome cu cuminsa goberna, esey ta nifica cu e a busca sosten di Dios y no di hende.
Rey Ahab un mal rey , tabata busca sosten di hende, pa e bay guera y e a wordo herida y a muri ora e bataya a termina.(1 Reynan 22:34).
Ora ta trata di nos famia, nos mester compronde cu ta Dios ta sostene nos y con grandi e salario por ta, e no ta alcansa ora malesa bati na porta, pasobra placa no por cura hende, sanacion ta bini di Dios.
Propiedad no ta salba hende, pasobra ora nos sera nos wowo tur cos ta keda atras, nos no por bay cu nada.
Isaias Capitulo 41 ver 10 ta bisa: No tene miedo, pasobra Mi ta cu bo, no desmaya, pasobra Mi ta bo Dios, Lo Mi fortalece bo, si lo Mi yudabo, si, lo Mi sostene bo cu e man drechi di husticia.
Aki nos por mira cu nos mester depende di Dios y consulta Dios, y biba segun e palabra di Dios, y no haci nada pa nos cuenta, no gamble cu nos bida, ni ta poco confia den webo di gai, corre leu for di bruheria, y wanta firme na e palabra di Dios.
Isaias Capitulo 41 vers 13 ta bisa: Pasobra Ami ta Señor Bo Dios , Kende ta sostene bo man drechi, Kende ta bisabo: No tene miedo lo Mi yudabo.
Salmo 54 vers 4 ta bisa: Mira, Dios ta mi yudado: Señor ta esun cu ta sostene mi alma.
Cristo Hesus ta e gobernador di bo hogar, e ta e pilar principal, no entrega e derechi di goberna bo hogar den man di satanas, pa motibo di necesidad, no bay den inmoralidad y asina perde bo integridad y pone cara di Dios na berguensa.
Tempo ta trabahoso, pero un cos nos sa sigur cu tur esnan cu confia den e sosten di Dios lo ta mas cu Vencedor.
Sinceramente
Pastor Marcel Balootje.
