Maske cuanto hende kier desvia y aleha for di Dios, Dios su amor ta eterno pa nos, pasobra E a stima nos prome, hasta ora nos tabata pega, mal mara den nos picanan Cristo Hesus a muri na cruz pa nos tur por haya salbacion.
Dios a stima nos cu un eterno y E a prolonga misericordia riba nos bida. Dios kier nos tur bon y e ta desea pa nos tur wordo salba.
Su palabra ta bisa den Huan 15:4: Keda den Mi , y Ami den boso. Mescos cu un rama no por duna fruta di su mes, si e no keda den e mata di wendruif, asina boso tampoco, si boso no keda den Mi.
Ami ta e mata di wendruif , boso ta e ramanan, esunnan cu keda den Mi y Ami den dje esey lo duna hopi fruta, pasobra separa di Mi boso no por haci nada.
Capricho y cabes duro, y dureza di curason, ta pone hende purba y sigui purba, y sigui purba, sin Dios, y kere cu nan lo logra locual cu nan kier, pero Dios a spierta nos, y e diabel ta purba tur manera na ciega hende, mescos cu e a haci cu Adam y Eva den hofi di Eden, nan tambe a cuminsa kere cu nan por sin Dios y tur hende conoce e resultado.
Haci cosnan riba nos mes ta nifica keda draai rond den mesun situacion, sin ningun clase di adelanto, pero ora nos pone Dios na prome luga den tur cos, nos mira y sinti e cambio den tur cos , y nos por ta contento y halsa nos bos y bisa nos a logra pasobra Dios ta cu nos.
Pero ora orguyo, arogancia, falsedad y murmuracion ta domina nos bida, nos lo keda tira falta riba otro, mescos cu Adam a tira falta riba Eva, wak bon cu historia ta ripiti, pasobra caminda hende no kier repenti, historia ta ripiti.
Dios a duna nos tur cos pa nos bay dilanti den obediencia na Dios, pero asina cu nos kere cu nos ta Dios, y cuminsa bay contra Dios y su palabra, contra principionan, y asina laga inhusticia y inmoralidad drenta, Dios tin su manera di para tur cos y sinta warda riba nos te ki dia nos lo repenti y bira cara bek pa Dios.
Dios su Palabra ta bisa awe mas cu nunca: Y si Mi pueblo cu ta wordo na mi nomber humiya nan mes, y haci Oracion,y busca Mi cara, y bira for di nan mal camindanan, e ora ey lo Mi tende for di cielo. Y lo Mi pordona nan pica y cura nan tera.( 2 Cronicanan 7:14).
Dios a pone un condicion pa nos, un condicion cu no ta cambia, nos no por cera wowo, pasobra solamente asina nos por sali for di tur crisis, y tur caos,for di tur problema financiero y for di tur enfermedad, y for di tur tipo maldad y inmoralidad, cu ta hogando nos tur dia.
Ta hopi ta kere y pretende, y confia den forsa di hende, y no kier admiti cu sin Dios , nos no lo logra, y cu di tur manera nos tin di hala cerca , Dios bolbe bek riba su caminda, , pasobra e palabra di Dios ta fiel y berdadero bisando: Ami ta e mata di wendruif, pega na Mi boso por tur cos , lew for di Mi, boso no por nada.
Ainda tin tempo awe pa bolbe bek cerca Dios, pasobra mañan no ta priminti na ningun hende.
Si awe boso scucha Su Bos y lesa Su palabra no haci boso curason duro.
