Durante e conferencia di prensa ofrece diamars mainta pa Departamento di Impuesto (DIMP), e director mr. Luenne Gomez-Pietersz a ratifica cu e tarifa nobo di BBO ta 7% y nada otro manera, por ehempel, gremio a duna di conoce. Hunto cu esey a sigura e ley pa Plan Fiscal 2023 ta oficial y ta drenta na vigor dia 1 di januari 2023.
Un di e cambionan mas importante ta e introduccion di tarifa nobo di BBO. E tarifa actual ta BBO 1.5%, BAVP 1.5% y BAZV 3% pa un tarifa combina di 6%. E tarifa nobo di BBO ta ahusta na 2.5%, loke ta nifica un incremento di 1% y ta resulta den un tarifa combina di 7%.
“7%, no 7.52%, no 7.25%, pero 7%,” asina e director di DIMP a bisa claramente. Ta introduci conhuntamente un pakete di compensacion pa mitiga e efectonan di inflacion. “Naturalmente no por acapara tur efecto di inflacion door di e inflacion cu nos ta importa door di tur e efectonan cu desaroyonan mundial tin riba prijs di producto y of servicio,” asina mr. Gomez-Pietersz a bisa.
