Aña pasa tabata uno basta dificil pa DIMAS. Esaki ta bin pa motibo cu nan tabata cera, e peticionnan tabata drenta online aunke nan no tabata fisicamente den edificio. Tur esey a crea cu nan tabatin un retraso basta grandi. Hopi cliente di DIMAS a sufri di esaki tambe.
Marilyn Wout, relacionista publico di DIMAS, a splica cu p’e aña aki nan ta traha hopi duro pa baha e restraso aki. Desde januari te 8 di september, DIMAS a ricibi un total di 8343 peticion. Y mas di 82% a ricibi un contesta caba. Esey ta un indicacion cu mas o menos 17.84% ta en espera di un contesta di DIMAS.
El a sigui informa di e 1488 peticion cu ta den proceso, mas di mita ainda ta den nan termino di seis siman. Pa ley di maneho, DIMAS tin seis siman pa duna cliente contesta sea positivo of negativo riba peticion dje permiso. Nan por alarga esaki pa cuater siman mas haciendo esey un maximo di dies siman.
Asina ey nan tin mil peticion cu ainda ta den su termino di tempo. Pero nan tin 500 peticion cu a pasa nan termino di tempo, cual ta mas di dies siman den proceso. E peticionnan aki tin nan atencion y ta trahando duro pa saca nan lo mas pronto posibel.
