Tin un situacion hopi fastioso cu ta tumando luga den Dakota. Tin un of mas cacho peligroso den Dakota y nan ta move den area di Misa Fatima, y ta causa un situacion hopi fastioso pa e fielnan cu ta yega of sali di misa.
E ta hopi fastioso pa e hobennan, corda pa e grandinan cu no por move lihe. Recientemente tabatin un caso unda cu un persona a resulta herida. Segun por a compronde for di un ciudadano, ta un par di siman caba cu nan a bin ta notando presencia di cachonan peligroso rond di Misa Birgen di Fatima na Dakota. Pa ta mas exacto dilanti di Papayastraat 5.
Siman pasa diahuebs, dia 13 di juni, un ciudadano cu a acudi na e misa di San Antonio di Padua, a sinti e peligro aki den carni propio. Na final di e misa, e tabata bayendo direccion di su auto, ora cu un di e cachonan aki a atac’e y morde ferozmente. A dicidi di bay na e cas en cuestion pa papia cu e doño, pero e ta nenga cu e animal ta di dje.
E ciudadano, kende ta un fiel bishitante di Misa Fatima ta bisa cu e ta mira e cacho drumi den e cura ey. Si e no ta di dje, di con ta permitie drenta paden. Papiando rond, a bin tende cu ta mas hende e cacho aki a morde caba. Ley ta bisa cu mester deshaci di un cacho cu ta peligroso pa comunidad. Y den e caso aki ta diferente hende el a morde caba.
Un suplica ta bay na autoridadnan competente por yuda e bario cu e problema aki.
