Normalmente Aruba ta haya cargamento di fruta y berdura fresco un bes pa siman. Esey no tabata e caso siman pasa ora cu e barco cu normalmente ta sali di Port Everglades pa Aruba riba diasabra pa yega diamars, su motor a daña y mester a tow e bay cu ne Jamaica. E imprevisto aki a ocasiona cu tur supermercado, minimarket y restaurant riba nos isla a conoce un escasez di producto; for di esunnan mas basico te na esunnan mas specifico.
E consumidor por a tuma nota di esaki, no solamente ora di haci compras, pero tambe ora di bestel nan cuminda faborito. Director di Compra N.V., un di e agencianan distribuidor mas grandi, a confirma cu un di dos barco a yega Aruba e siman aki y pa diaranson atardi anochi, tur cliente lo mester por haya nan pedidonan pendiente.
Pa loke ta trata e barco y containernan di Aruba cu ainda ta pega na Jamaica, ta asina cu keto bay no por a haya un di dos barco pa bay aya, unload e containernan y bin cu nan.
Dirks a confesa cu ningun hende sa ki dia nan lo yega of den ki condicion e cargamento lo yega. “Nos ta crusa dede, pero esaki lo ta un daño basta substancial pa tur importador di fruta y berdura. Na prome luga bo ta perde di bende, bo a perde ganashi e siman ey. Y na di dos luga, bo a cumpra un producto, bo a paga e producto y e producto a daña.”
El a splica cu e barco ta responsabel pa e container yega den bon estado cerca su doño. Ora cu finalmente e containernan aki yega, lo mester haci un claim pa wak cuanto placa por haya bek di e compania. Esey ta un proceso cu ta tuma su tempo. Den Dirks su experiencia, basta tempo. “Danki Dios no ta bay failliet pa via di esey, pero e ta fastioso.”
Reflexionando riba esaki e comerciante ta bisa cu gobierno mester realisa cu nos ta importa tur cos. Aworaki tur container ta bin for di un puerto, cu un barco, un bes pa siman. Si algo pasa cu ne, nos ta keda henter un siman sin productonan fresco.
Pa e relato completo, lesa TREMPAN.
