Pan American Development Foundation y Telefon pa Hubentud (131) a cera un aliansa pa crea un proyecto pa trece conscientisacion, principalmente bou hubentud, pa mas tolerancia y aceptacion pa e stranheronan.
A base di e aliansa aki a surgi e proyecto di un pelicula cortico cu lo estrena diabierna awor na e sala di pelicula di Gloria.
Den e conferencia dialuna e trahado social di Telefon pa Hubentud KImberly de Cuba a papia yen di entusiasmo riba e dos proyectonan cu a sali di un aliansa entre Fundacion Telefon pa Hubentud y PADF.
E organisacion di Telefon pa Hubentud ta hopi conoci pa su dedicacion na hubentud, pero tambe sa traha cu organisacionnan local. Asina di e forma aki PADF a acerca e fundacion pa un proyecto pa crea empatia bou di e grupo di hobennan local y esnan stranhero.
E trahado social a splica cu nan ta sinti cu discriminacion a bin ta aumentando. E ta duna un sentimento di no ta parti di e comunidad y ta pone e persona pensa cu e no mag participa den e comunidad ey. E ta pone e persona perde confiansa den instancianan y sinti cu nan no ta pertenece.
Pa elimina e sentimento ariba describi, na aña 2023 a bini cu e proyecto “My Story” pa crea empatia entre hobennan local y hobennan inmigrante. Esaki cu e meta di reduci discriminacion y xenofobia. Danki na e fondonan poni door di Bureau of Population, Refugees Migration, hunto cu PADF y Telefon pa Hubentud, a cuminsa implementa e proyecto “My Story” den 2024. El a splica cu ocho hoben local hunto cu ocho hoben stranhero a participa den e pelicula cortico.
Durante seis sesion, e hobennan a siña tocante derecho di mucha y igualdad. Pero tambe a crea un obra di arte y a haci actuacion den e pelicula cortico. Contenido di e pelicula cortico aki ta un inspiracion, skirbi y actua pa e grupo di hobennan participante. E ta ilustra nan experencia bishitando cas di otro. E ta mustra tambe cu nan ta desea pa nan hogar y Aruba ta.
Diabierna awo pa 3:00 PM ta estrena e pelicula aki den IMAX Auditorium di The Movies @ Gloria. Durante e mesun conferencia di prensa a hiba palabra Amy Richards (Program Manager di PADF) y a papia di e proyecto aki cu a bira realidad danki na cooperacion financiero di instancianan internacional.
PADF ta un organisacion cu pa casi cuater aña caba ta brinda ayudo y apoyo specialmente na migrantenan vulnerabel den comunidad. Pa esaki ta traha cu diferente organisacion cu ta traha riba e tereno aki, y cu fondonan Mericano ta apoya e organisacionnan pa nan tin un impacto pa yega mas cerca di e comunidad cu mester di e ayudo.
Richards a splica cu e aña’ki e organisacion a pone un enfoke riba e hobennan y crea un iniciativa pa combati xenofobia (miedo pa loke ta straño of stranhero). Di e forma aki kier crea mas compasion y comprension bou di comunidad pa esnan cu ta bini exterior y establece nan mes na Aruba.
Aki ta caminda a cera aliansa cu Fundacion Telefon pa Hubentud, cu sa con pa yega na e hobennan. Nan a bin ta trahando cu hoben pa cual a crea un programa di integracion pa combina e bida di hobennan migrante hunto cu esnan local, compartiendo nan experiencia y conociendo otro un poco mas miho.
E hobennan aki durante e periodo cu nan tabata hunto a crea un obra di arte via cual a expresa nan mes. E programa ta culmina cu premiere di un pelicula cortico den cual e grupo di hoben a crea nan script via cual ta mustra con nan ta mira Aruba, e diferencia y similaridad cu ta biba entre comunidad migrante y esun local. E mensahe final ta con pa biba mas den union cu otro.
Banda di e estreno di e short movie, simultaniamente lo tuma luga un exposicion di e pinturanan cu cada un di e hobennan a crea. Cada pintura ta e storia individual di cada hoben.
Fundacion 131 y Pan American Development Foundation ta hacie posibel pa banda di e invitadonan, 15 persona por presencia e estreno di ‘My Story’. Si bo persona ta interesa pa presencia e estreno bo por manda nos un mail na [email protected].
Pa mas informacion tocante ‘My Story’ por tuma contacto cu 131 via nos website: 131.aw, facebook: https://www.facebook.com/aruba.131/, email: [email protected] of telefon 5886138/ 5884011.
