Diabierna mainta a tuma luga den Renaissance Convention Center un asina yama Dia Pedagogico organisa pa Fundacion Pa Nos Muchanan dedica na tur persona cu ta traha den un centro di cuido y guia pa mucha di 0 pa 12 aña. Esaki ta e di shete dia pedagogico cu ta organisa y cada un ta enfoca riba un tema. E tema pa 2022 ta Let’s Talk. Cu e tema aki a profundisa riba con e personal pedagogico por evalua e desaroyo di un mucha di 1, 2 y 3 aña y comunica e resultado di e evaluacion aki na e mayor di e mucha.
Natasha Gilkes, director di Fundacion Pa Nos Muchanan a splica cu esunnan invita pa e dia di estudio ta tur persona cu ta traha den un centro di cuido pa mucha cu no ta bay scol ainda, un Traimerdia of un combinacion di esaki.
“Con por comunica cu mayornan na un forma efectivo riba un situacion cu ta regarda nan yiunan. Esaki no tur ora ta bay facil pasobra e tin su retonan, pero tin forma pa cana pa haci cu e comunicacion ta bay bon,” Gilkes a bisa. “Con ta bay cu e desaroyo di su yiu? Na ki momento ta e miho manera pa haci esaki? Con ta e miho forma pa haci esaki? Kico bo mester tene na cuenta ora bo ta papia cu e mayor? y tambe e diferente emocionnan cu por bin dilanti.”
Pa e relato completo y mas imagen, lesa e proximo edicion di TREMPAN.
