Dia 5 di juni, cual fecha Nacionnan Uni y mundo henter ta observa, ta Dia Mundial di Medio Ambiente (World Environment Day). E celebracionnan aki ta mas tanto un yamada riba mundo henter pa crea conscientisacion riba e temanan urgente di medio ambiente. Nos planeta tin hopi reto di medio ambiente cu necesidad di restauracion pa asina sigui brinda e servicionan na hende y ecosistema.
Riba e dia aki Nacionnan Uni ta promove tambe e progreso di e accionnan medio ambiental di e metanan di desaroyo sostenibel (SDG). Directie Natuur en Milieu tin e tarea pa prepara, traha, ehecuta y evalua maneho cu ta conduci na un ambiente di bida saludabel pa hende y naturalesa na Aruba. Directie Natuur en Milieu tin como meta pa mantene, proteha y mehora calidad di naturalesa y medio ambiente na Aruba. Ta pa es motibo aki, riba e dia mundial di medio ambiente Directie Natuur en Milieu ta contribui den forma di conscientisacion.
E planeta mester di nos accion humano pa restaura e ecosistemanan. Tin un emergencia climatico: tin perdida di naturalesa, polucion ta menasa nos planeta tera y un cantidad grandi di especienan cu nan habitat ta destrui. Ta p’esey Nacionnan Uni a declara cu e decada 2021-2030 ta dedica na e tema di restauracion di e ecosistemanan. Humanidad tin e poder, sabiduria y capacidad pa cambia y stop e daño cu Mama Tera a bin ta sufri, asina salvaguardiando esaki pa e siguiente generacion. Cuminsando riba e dia aki DNM ta desea di motiva individuo, grupo, gobierno, e negoshi- y organisacionnan pa uni na e movemento global pa restaura e ecosistemanan degrada, asina sigurando un futuro sostenibel pa tur envolvi.
Kico nos kiermen cu restaura y kico ta e metanan desea pa aña 2030?
· Baha e emision di e gasnan tipo greenhouse na mita pa asina preveni cambio di clima.
· Tene na cuenta e metanan di desaroyo sostenibel. Asina nos por elimina pobresa y combati enfermedadnan pa salvaguardia biodiversidad.
· Pone un paro na perdida di biodiversidad cu tin como consecuencia: posibilidad di extincion.
· Nos por logra esakinan si hacie di curason y cu amor pa e planeta.
Abo ta cla pa join #generationrestauracion? DNM ta recomenda e metodo di 3 manera: tuma accion, haci bon escogencia y ta e bos pa restauracion. Un accion por ta haci trabounan boluntario na un di e iniciativanan di restauracion existente manera esun di Ban Lanta y Planta. Nan tin como meta, planta matanan local pa yuda combati e cambio di clima. Sea parti di un accion di limpiesa di beach, mondi, parke of lama. Manera ta esunnan di Scubblebubbles, Piki dos pa nos y Aruba Doet. Planta mas mata den bo mesun cura, na scol, trabou of area publico. Haci donacion na un organisacion cu tin como meta, restauracion y conservacion di naturalesa. Stop cu practicanan cu no ta cualifica como sostenibel. Cuminsa un dieta cu ta basa ariba productonan sostenibel (plant-based).
Haci algo pa bo ta e bos pa restauracion. Por ehempel: pone un exhibicion di arte of potret di e bunitesa di ecosistemanan natural local, tene un discurso/dialogo cu ta trata e balor di ecosistemanan, skirbi un articulo pa publica den corant, revista of social media.
Saca un potret of video di e accion cu abo mes ta tuma y pone riba social media cu e hashtag #generationrestauration #worldenvironmentday. Bay riba e Facebook page di Directie Natuur en Milieu, dnmaruba pa wak algun video cu ta sirbi como ehempel.
Riba e plataforma di website worldenvironmentday.org, decadeonrestoration.org y unep.org por haya informacionnan mas amplio y bo por profundisa den e topiconan cu nos ta menciona den e articulo aki. Directie Natuur en Milieu ta curasha un y tur pa tuma accion y sea e bos pa nos planeta tera y su ecosistema cu mester di nos ayudo asina e condicionnan ta uno sano pa generacionnan cu ta bini. Di un generacion pa e otro nos ta cuida locual nos a haya pa duna bek cu amor den bon condicion na e otro generacion cu ta bini.
