Marcos Bislip astronomo y astrofotografo ta informa cu dia 24 di juni 2022, e cinco planetanan lo bay ta den e maximo den un aliniacion. Ta trata di planeta Saturno, Jupiter, Marte, Venus y Mercurio y na unda e Luna lo compañanan. E Luna ta entre Marte y Venus.
A indica cu for di dia 23 di juni 2022 e cinco planetanan y luna tabata visibel for di mainta tempran caba, un poco despues di 5:00 am.
Aruba Astro Research Int. a logra saca potret di cuater planeta, esta Jupiter, Marte, Luna, Venus y Mercurio.
E evento asina ta pasa cada 18 aña y ta spera cu e tempo coopera cu asina por disfruta di un bunita evento celestial di e planetanan pa cu e luna di juni 2022.
Ta bon pa menciona cu e planetanan ta den aliniacion caba pa seis luna largo, na unda durante e seis lunanan aki Aruba Astro Research Int. a cubri e eventonan aki. For di januari 2022 te cu awor na juni 2022. Tambe a logra cubri e evento di eclipse total di Luna di dia 15 y 16 di mei 2022 exitosamente.
Despues di hopi tempo Aruba Astro Research Int. a logra haci un observacion hunto cu e comunidad na unda a saca potret, filma y transmiti live un parti di e evento di eclipse, na unda lastimamente a confronta un fayo tecnico pero tambe contratiempo cu hopi nubia. Dado momento mester a stop e transmicion pero a logra capta via potret y filmacion e fenomeno satisfactoriamente. Dia 15 di juni 2022 a haci un transmicion di prueba ariba e luna cu telescop Astro Master Celestron y tabata perfecto.
Si condicion di tempo ta bon por observa e aliniacion di e planetanan te cu na fin di luna di juni y juli. Mester trece pa dilanti esaki ta e aliniacion di mas largo di 6 luna y den luna di juni un aliniacion importante.
