Buki di Pret Aruba ta un fundacion cu ta consisti di boluntario y tur aña nan ta ofrece un buki yena di actividadnan pa e temporada di vakantie grandi.
Diaranson esaki a tuma luga e entrega di e buki di e aña aki y esaki a tuma luga na Graf von Zinzendorfschool.
Kitty van der Knaap t’e creado di e Buki di Pret Aruba y esaki ta nan di cuater aña haciendo esaki, es decir for di 2021. El a conta cu nan a cuminsa ya for di 2600 mucha cu a haya e buki aki. E tempo ey nan tabata diesun scol. Y pa tres aña caba, nan ta entregando e buki aki na tur mucha di scol basico, for di klas un te cu klas seis. Ta trata aki di 8500 te cu 8700 mucha.
Nan a cuminsa c’un grupo chikito, di cuater pa cinco persona. Cada un tabatin un tarea, sea di diseña e buki, otro ta encarga su mes cu e parti financiero. pero tambe nan ta bay tur e actividadnan cu ta para den e buki.
Van der Knaap a sigui bisa cu nan ta haci tur cos pero den grupo chikito. E aña aki nan ta un grupo mas grandi, di mas o menos 7 pa 8 persona. Sinembargo, otro aña e grupo lo ta chikito atrobe, door cu tin algun di nan cu ta bayendo bek Hulanda.
Tambe nan tin algun persona cu ta yuda nan haci cierto cosnan, algun persona specialisa riba cierto terenonan. Si nan mester di hende, e ora nan ta purba di hay’e den nan mesun network pa asina bin yuda nan.
Pero nan tur ta boluntario. E idea a nace na Boneiro y ta trata aki di hendenan cu Van der Knaap mes conoce y cu a pidi nan pa haci esaki na Aruba tambe.
En principio e ta un idea cu a nace na Hulanda caminda cu ta haci esaki den e ciudadnan mas grandi manera Rotterdam, Amsterdam, Den Haag. Eynan a haci entrega di e bukinan n’e muchanan pa asina nan tin actividad y pasa un dushi vakantie yena di actividadnan.
Buki di pret ta un buki yen di actividad pa e muchanan di entre 6 te cu mas o menos 13 aña. E ta un actividad cu ta haci cu ayudo di diferente instancia, manera hospital of un scol deportivo. Te Scol di Arte. Mas bien den tur categoria, manera educativo y deportivo.
Tambe nan tin varios museo cu ta participa y nan ta pasa e informacion aki pa nan, cu na nan turno ta hinc’e den e buki. Van der Knaap a enfatisa cu e buki aki ta totalmente gratis.
Buki di Pret ta un organisacion sin fin di lucro y ta draai riba base boluntario. Nan ta hacie pa asina duna e muchanan di Aruba e oportunidad di pasa un dushi vakantie grandi. E ta un manera tambe pa e muchanan desaroya of descubri nan talento cu nan tin scondi. Importante pa remarca ta cu e buki ta completamente na Papiamento.
Pero e tin su traduccion tambe na Hulandes, pa cual por bisa cu e buki ta bilingual. Pero no ta tur ora tin espacio pa pone mas c’un idioma den e buki. Pa nan ta importante cu tur mucha por lesa y compronde e buki.
Diaranson tabata un dia hopi special pa Graf von Zinzendorf ya cu nan tabatin e honor pa a ricibi e prome Buki di Pret p’e aña aki. Edith Geerman, cabesante di Graf von Zinzendorf a enfatisa cu desde comienso di Buki di Pret, semper nan a participa.
Tambe tabata un honor pa a ricibi Shanaya Howell cu ta un mucha di San Nicolas. El a bin duna un demostracion riba su bicicleta cual ta un estimulo tambe p’e muchanan pa desaroya cualkier talento (scondi) cu nan por tin.
Geerman a enfatisa cu pa e actividadnan aki, e mayornan lo mester yama y reserva hopi trempan, pasobra cu algun di e actividadnan aki ta yena hopi trempan. Pero scol a haya hopi bon feedback di e mayornan di cual nan yiunan a participa.
Importancia di reserva na tempo ta pasobra cu por ehempel tabatin mas di 80 actividad y ta spera cu e aña aki participa un biaha mas.
