E fin di siman aki, esta dia 15 di juni, ta tuma luga e campeonato di Taekwondo del Caribe. Aki diferente scol di Aruba como di otro pais lo participa. Tambe a organisa un taekwondo camp cu dos coach internacional.
Teo Rodriguez, coach Tiger Taekwondo, a splica cu esaki ta e di 23 vision di Open Internacional di Taekwondo di Aruba, pero tambe di Caribe. E evento a cuminsa caba cu un camp. Pero diasabra ta bay tin e campeonato y esaki ta inicia pa 8:00 am, unda pa 9:00 am tin apertura.
Tur atleta participante ta na Aruba caba. Segun Rodriguez, entre cinco pa seis pais a confirma y nan lo ta na Aruba caba. Varios atleta a prepara p’e campeonato aki. Tur scol di taekwondo di Aruba a confirma nan participacion, esaki ta algo importante. E dia ey lo tin shete pa ocho scol ta bataya. Tambe ta bay tin TK3, Poonse y e campeonato aki lo ta uno espectacular.
Monica Pimentel, coach Impact Taekwondo, a indica cu di dialuna pa diahuebs tabatin un training camps y a invita dos coach internacional. E dos coachnan aki tabata encarga pa dirigi e camp. Pa nan e training camp ta importante debi cu esaki ta p’e desaroyo di e atletanan local como desaroyo di e deporte. A programa e camp aki pa tur mucha cu ta competi den e campeonato di Taekwondo del Caribe.
E camp a bay bon, unda cu tabatin tempo pa train cu e muchanan cu a bin di afo. A bin atleta di Surnam, Colombia, Corsou, Honduras y nan tambe a participa n’e camp. Pa loke ta e campeonato internacional, nan kier tin un evento di calidad, tin e tecnologia necesario pa uza. P’e competencia aki tin seis referee internacional, di cual dos di nan ta olimpico.
Damian Villa, coach USA, a expresa di ta contento di por a comparti su experencia cu el a adkiri durante hopi tempo door di competi y como coach internacional. E tabata feliz di por a comparti su experencia cu e atletanan di Aruba como esunnan di exterior. P’e esaki tabata un honor unda cu e por aporta na yuda cu taekwondo ta sigui crece den region.
Monica Urrego, coach Colombia, a expresa cu p’e campamento nan tin expectativa hopi grandi. E trabou ta pa structura hopi bon e temanan cu ta duna e participantenan. E idea ta cu e muchanan ta bay cu un conocemento mas amplio di tur loke a siña nan durante henter siman. Tambe e parti cu nan conoce caba, pa nan sigui mehora.
