Den un conferencia di prensa diahuebs mainta Procurador General Alexander van Dam, den compania di Hefe di Polis Dolfi Richardson, a papia di e caso FIST, unda cu un mucha muhe hoben di 19 aña a wordo mata na De Vuyst dia 3 di november, 2017.
E homber J.A.C di 46 aña cu a wordo deteni, ta un conoci di husticia pero ta un bon conoci di famia di e victima. Di e forma aki PG van Dam a cuminsa e conferencia di prensa bisando.
“Cuerpo Policial di Aruba durante e ultimo 3 lunanan a bin ta haciendo un investigación intensivo di e caso aki bou guia di un fiscal di Ministerio Publico. Mi kier a probecha e team forensico di KPA cu a haci un trabou sublime den e caso aki cu tur e pruebanan cu nan a acumula,” PG a expresa.
El a sigui splica cu for di inicio di investigacion e testigonan a menciona diferente nomber di personanan cu lo por ta envolvi den e delito grave aki, unda bida di un hoben a wordo kita. Y JAC tabata un di e nombernan cu a wordo menciona for di comienso di e investigacion door di e testigonan. Di tur e personanan menciona, a haci un investigacion amplio di nan tur pa mira nan eventual participacion den e crimen di De Vuyst. E mencionamento di nomber so, el a enfatisa, no ta haci cu un persona ta bira un sospechoso. Polis mester bay haci investigacion si nan tabata na e sitio di e delito, ta haci un investigacion riba nan celular, etc. Un investigacion asina ta tuma hopi tempo pasobra e ta wordo haci di un forma hopi cauteloso.
For di inicio di e investigacion tambe tabata sa cu e investigacion forensico ta bay hunga un rol grandi pa hiba autoridadnan na esun responsabel di e crimen. E investigacion forensico tabata riba curpa di e victima y e area unda e delito a wordo cometi, tur loke cu a wordo laga atras, huellanan DNA, huellanan di dede, etc. “Nos tabata sa di inicio cu esaki ta e yabi di e investigacion.”
Mientras cu tabata sperando riba e resultadonan for di e laboratorio Instituto forensico di Hulanda, a concentra e investigacion riba tur e personanan cu a wordo menciona door di testigonan. Den e investigacion aki KPA a logra na descarta diferente di e nombernan cu a wordo menciona como sospechoso door di testigonan.
E resultado di e testnan forensico a yega cerca Cuerpo Policial diaranson ultimo. E resultadonan aki den combinacion cu e resultado di investigacion di KPA, a pone cu e sospecho a cay riba JAC y a pasa pa su detencion mesora. Pa motibo di investigacion andando ainda, PG a bisa, e no por duna informacion riba e causa y circumstancianan di e morto. Awo e otro parti di investigacion ta bay cuminsa, unda ta confronta e sospechoso cu resultado di e investigacion door di e team di KPA y e resultado forensico.
