Investigacion ta hermeticamente cera den e caso di e boto cu a yega cu un cantidad grandi di droga, den cual dos persona a hoga. Intento pa haya mas informacion, a keda, manera nan ta bisa, na “visto”.
Segun por a compronde extra-oficialmente, no ta trata at all di un transporte di persona cu kier a drenta Aruba di un forma ilegal, pero entrega di un cargamento basta grandi di droga.
A resulta cu un di e supuesto ilegalnan cu a hoga den e travesia pa drenta Aruba via di e costa mas peligroso di e isla,a na Vader Piet, ta di e sector Cruz Verde, municipio Miranda, estado Falcon. Ta trata di e homber Luis Miguel Pernalete, di 24 aña, kende tabata traha como cuidado di preso na e prizon di Sabaneta, staciona na e prizon di Barquisimeto. Sinembargo ta parce cu el a tuma algun dia liber y a probecha pa biaha pa Colombia, for di unda el a nabega den e boto cu dialuna mainta a yega Aruba den ora di marduga carga cu purun yena cu droga.
Otro informacion den circulacion ta cu e homber di 24 aña su intencion en realidad ta pa yega Corsou, pero a acepta e trabou pa trece droga Aruba y for di aki trata di yega isla ruman Corsou.
E otro fayecido te ainda no tin indicacion kende e ta.
No ta prome biaha cu boto cu ilegal ta yega Aruba cu droga abordo. Hopi lo puntra ta con ta yena droga den e tanki aki. Segun por a compronde, ta hinca e droga for di e parti abou cu na final ta nan pega bek cu lijm. Y e droga ta den estilo normal, esta puiro.
Cuanto peso tin den cada un di e mini containernan aki no ta conoci. Pero no ta prome biaha cu e ta yega den e forma aki. Segun algun persona consulta, ta calcula cu por ta rond di 25 kilo pasobra e mester ta di un peso cu un homber por hisa. E ora por papia di mas cu 500 kilo di cocaina, cu sigur no ta destina pa mercado local y cu tabata un sla fuerte pa narcotrafico.
Mientrastanto por bisa cu investigacion ta sigui pasobra tur e tankinan aki tin un marca riba nan y e autoridadnan por medio di esaki por bay bek pa controla si den pasado tabatin cargamento cu e mesun marca aki.
