Desde dialuna cu a pasa a cuminsa cu tur tres localidad cu ta vacuna, esta Centro Libertador Betico Croes, Don Bosco na Noord y Santa Teresita Center na San Nicolas ta habri.
Segun Jurette Croes, relacionista publico di Departamento di Salud Publico (DVG), prome ta Santa Cruz so tabata habri for di dialuna pa diasabra. San Nicolas y Noord, tabata rouleer, esta tres dia pa siman tabata na Noord y tres dia pa siman tabata pa San Nicolas.
Entrante dialuna te cu diasabra a cuminsa cu tur tres localidad for di 8’or y mey di mainta pa 11’or y di 2’or di merdia pa 5’or.
Ta vacunando mas of menos 1400 persona pa dia den e dianan aki, cu ta hopi importante pa sigui vacuna, mirando e cantidad di casonan cu ta aumentando den e dianan aki.
Tambe ta informa na comunidad cu MFA ta sigui funciona. Nan ta yudando personanan 60+ pa registra y tambe personanan cu no tin documento, esta ilegal of personanan cu ta trahando na Aruba, pero no tin AZV of studiantenan cu no tin AZV, por pasa na MFA y ta yuda nan cu e parti di registracion.
Tin MFA na Noord cu ta funcionando, MFA na Santa Cruz, MFA na Paradera, cu excepcion di MFA Savaneta.
Pa pariba di brug, a habri Centro Santa Teresita pa registracion. Dus por vacuna y registra.
Croes alabes kier a informa cu aworaki ta vacunando personanan di 60+, pero tambe a cuminsa vacuna personal di Cuerpo Policial. A cuminsa planea vacunacion entrante diahuebs di e docentenan.
Tin por lo menos 600 docente cu a registra. Pa esaki a pidi na e docentenan pa nan no unicamente registra via Aruba Health App, pero manda nan informacion na Simar of na SEPPA. Esaki ta necesario pa haya yudansa pa por filter e grupo aki for di e sistema di Health App.
E docentenan cu a registra na Health App, pero no a haci esaki na Simar of SEPPA, no ta importa si ta miembro of no. E sindicatonan ta yuda DVG den e parti administrativo, pa por filter tur e docentenan y tur esunnan cu ta traha den e ramo di enseñansa.
