Aruba ta habri diadomingo cu tres morto mas door di Covid-19. Tabata dos siman pasa cu e casonan di Covid-19 na Aruba a conoce aumento drastico. Pa purba contene e casonan di contagio, gobierno a introduci algun medida pa purba control’e. Despues di dos siman di casonan halto, awe por a tuma nota di un leve bahada di caso. Pero pa tres persona, e medidanan a yega mucho laat.
Segun resumen di awe 135 persona a recupera y un total di 71 caso nobo di COVID-19 a keda registra cual 8 ta turista y 63 ta residente. E cifranan aki ta representa un ‘Positivity rate’ bou di nos residentenan di 25%. Cantidad di casonan activo di COVID-19 pa awe ta 1084 y cantidad di fayecidonan relaciona cu COVID-19 a aumenta na 119 cu fayecimento di 3 residente. Den e ultimo 30 dianan un total di 10 residente a fayece debi na complicacionnan relaciona cu COVID di cual 2 tawata tin vacuna y 8 no tawata tin ningun vacuna. Condolencia y forsa na famia di tur e fayecidonan.
Dato di COVID ta ilustra subida di casonan nobo cu un averahe semanal di 122 caso pa dia y un averahe di ‘positivity rate’ semanal di 30% pa dia.
Hospital tin actualmente 51 persona interna di cual 6 ta den ICU, 44 riba piso general y uno riba piso di maternidad (hende muhe na estado)
