Diabierna atardi Departamento di Impuesto (DIMP) a cera 2018, e delaster dia di trabao pa e departamento. A celebr’e cu coleganan cu a prepara un evento pa hunto mira bek kico ta e logronan durante aña 2018.
Un aña cu no tabata facil mirando e proyectonan for di inicio di aña, a haya bishita di OECD, a introduci un sistema nobo na april, a defende rapport pa Aruba den cuadro di e exchange information. Tambe a prepara cambionan den e reforma fiscal cu a traha duro riba dje, como departamento y sin lubida e meta impone pa cu entrada di belasting.
Si mira entradanan den su totalidad, a cobra mas of menos 40 miyon mas cu aña pasa. Pero si mira e restitucionnan (duna placa bek di belasting paga di mas) cu a paga den aña 2018, ta mas of menos 27 miyon.
Segun director di DIMP, Luenne Pieters, nan a traha duro, no solamente pa cobra impuesto cu mester a wordo cobra pa drenta caha di gobierno, pa cumpli cu e normanan di CAFT por ehempel. Pero tambe a traha duro pa haal in e retraso cu tin riba tereno di restitutie. E ta cana man den man. Ta cobra, pero tambe percura pa tin nan cas na ordo y tambe por paga e restitutie cu e cliente ta warda riba dje.
Cobransa di impuesto no por haci’e mas facil of mas placentero, pero si mas husto. Cu esey tambe ta purba di duna informacion. Si mira 2018, a trata di duna mas informacion posibel riba leynan di impuesto, trahando conhuntamente cu Camara di Comercio, cu ATIA y cu IDEA entre otro.
A duna diferente sesion di informacion, caminda cu ta yega mas cerca di e cliente y e cliente ta sinti’e tambe comodo pa haci preguntanan di impuesto. No tur ora impuesto ta facil pa compronde y pesey DIMP tey.
Esey tambe ta un rol di Departamento di Impuesto. Si mira bek den 2018, ta cu un sentido di satisfaccion. Ainda falta algun cos pa sosode. Tin cu cera luna di December, manera cu aña bolter.
Luenne Pieters a gradici e 260 trahadonan cu ta traha dia y anochi pa hiba e departamento dilanti. Sa cu no ta perfecto, pero sa si cu a cuminsa un caminda y ta mira adelanto den loke nan ta haci.
Un danki di curason na cada un empleado cu a sa di kere den e vision di Pieters pa maneha e departamento y tambe na e clientenan cu a cumpli cu nan deber di impuesto manera debe ser, pa asina ey tambe por a cumpli cu gobierno.
“Ora cu cumpli cu impuesto, bo ta cumpli cu bo pais”.
Y esey ta algo hopi importante cu tin cu corda semper.
Aña 2019 lo bay ta un aña cu su retonan riba tereno financiero. Pero tambe lo bay sigui traha cu mas eficiencia den e departamento. E digitalisacion di e organisacion ta bay haya su forma y lo kier anuncia sigur pa fin di aña cu lo por brinda extra servicio na clientenan pa nan por haci nan aangifte di loonbelasting, BBO di forma online. Ta algo cu lo pusha riba dje.
Ta trahando riba un app caminda e informacion por wordo duna na e clientenan.
Pa motorrijtuigbelasing sigur lo forma un parti importante pa ora e cliente busca su plachinan di number.
Otro aña lo bay ta uno cu su retonan, riba tereno fiscal, financiero y tambe toch un aña cu hopi excitacion, pasobra ta cosnan nobo cu lo kier brinda e clientenan.
No mester lubida cu lo bay tin e segundo fase di e reforma fiscal. Lo traha tambe riba dje. Contal tin suficiente cosnan riba borchi pa por bay haci otro aña.
Luenne Pieters ta desea e pueblo di Aruba un bon cambio di aña, hopi bendicion pa hogar, pa famia y amistadnan. Danki pa e sosten, danki cu nan tambe ta kere den e vision di departamento di Impuesto y lo topa otro aña atrobe.
