Aruba a perde un gran persona, docente trovador, musico cantante, compositor guitarista un baluarte den historia di musica aki na Aruba y tambe conoci Internacionalmente, su nomber ta: Alex Edward Toppenberg miho conoci como Etty.
“Loke por bisa di Etty y su Trio Huasteca ta cu varios biaha nos tabata topa otro durante diferente actividadnan festivo caminda bo ta haya Vicente Kelly y Los Pimentosos ta comparti escenario cu trio Huasteca di Etty. Tambe durante Bon Bini Festival y riba Plaza Betico Croes durante actividadnan di Himno y Bandera. Na 2019, mi persona Chencho Kelly y Johnny Scharbaay, como Lidernan di Investigacion y Documentacion di Departamento di Cultura Aruba, a entrevista Etty tocante su trayectorio musical Artistico como Cantante Musico y Artista pa e Proyecto di “Biografia di Artistanan di Musica Arubano”.
Manera nos tur sa cu Etty a nace na Aruba dia 19 di augustus 1943, y a fayece 13 di September 2022.
Etty a lanta den Companashi y ta bin di un famia di diesun ruman. Despues cu Etty a labora varios aña den e Departamento di Impuesto, a bira Maestro di Scol y semper a keda mantene su musica. Etty su palabra tabata, ta dos podium bo tin, esun den klas y esun cu bo ta para canta.
‘Photo Hanna’ tabata un tienda cu tabata bende instrumentonan di musica y tabata keda banda di Djiespy’s Place e tempo ey caminda Etty su ruman homber Ronny cu tabata tin un bon trabou y a cumpra e prome guitara pa Etty di cual ta un ‘Ikam DC’ di Mexico. Di cual cu tempo e guitara a bira un Relikia y e tabata cuide masha hopi.
Cu diestres aña di edad Frere Arnold a pidi Etty pa bay canta pa un señora cu a haci cien aña di edad y tabata biba no mucho lew for di Piet’s Soda Fountain. Despues di esey a forma un trio hunto cu Eric y Armando Quilotte. Asina tambe Siegfried Odor (Canawa) cu tabata canta halto y ta famia di Rufo Odor cu a join nan den e trio. Edison Croes tabata tin un programa na Radio buscando talento a scucha nan y tin biaha ta invita nan pa bin toca den su show. Loke nan a ricibi e tempo ey tabata binticinco florin pa nan parti.
E trio tabata actua na diferente lugarnan manera, ‘Trappers Club’, ‘Goldenhard Club’, na San Nicolas, Club Boneriano, tambe na Savaneta y Lagoheights. Tur caminda tabata bay cu lift.
Dedicacion na musica
Door cu nan tabata canta hopi Ranchera a dicidi pa yama e Trio, “Trio Huasteca”.
Etty y Eric ta toca guitara y Canawa ta canta, Lucio Rivadeneira ta riba saxofon, un Boneriano riba un guitaron tambe Leon (Jon )Scharbaay tabata forma parti di e grupo. Esaki a pone cu Trio Huasteca cu tabata un di e promenan cu a yega te na Plaza Garibaldi na Mexico, bayendo pa Festival di OTI. Tambe a haci show na Venezuela caminda nan tabata bon acepta p’e bailadornan. Na Aruba Etty a canta cu Mariachi Vargas
Parti musical y Gruponan
Etty semper a percura pa e tin un dominio ariba su instrumento musical.
Nan tabata train na Radio Kelkboom hunto cu e banda di Lucio Rivadeneria
Etty a forma parti di Los Pricipes y San Hose di Corsou.
Etty a toca duna show na Boneiro hunto cu Lucio Rivadeneira y Joy Kock.
Tambe nan a toca den e prome parada di Carnaval di Aruba cu tabata pasa na pia y nan a toca cu Trio Huasteca cu cuarta y guitara y un maraca hunto cu Coyito.
Parti Internacional
Esaki ta un parti hopi grandi di Hawaii te Punta Arena Argentina.
A actua na Chile y tambe den un morning show na Hawaii na Television Mericano. Nan a bay Festival di Cancion di Caribe na Puerto Rico y sali na di dos luga. Nan a bay festival di OTI na 1978. Tambe nan a bay esun di Puerto Rico despues na 1991. Diestres aña despues nan a bay Festival di OTI na Mexico.
Trio Huasteca t’e unico grupo cu a bay Festival di OTI dos biaha. Tambe a actua na Alemania, na Merca, unda cu nan a presenta den ring di Boxeo y a canta e himno Mericano. Nan a bay Hulanda durante Arubadag. Nan a bay Sur America p.e. Peru, Ecuador y tambe nan a bay Mexico.
Etty a toca dos biaha pa Reina Juliana y Prins Bernard, tambe pa Reina Beatrix y Prins Claus.
Etty su sugerencia ta dedica na bo musica, Aruba tin tur cos pa duna bo.
Di parti di Director, Staff y Personal di Depatamento di Cultura Aruba (DCA),
kier a gradici Alex Edward Toppenberg mihor conoci como Etty pa su contribucion grandemente na e cultura di Aruba cu ta keda graba den e curason di Aruba pa semper.
Tambe kier a extende palabranan di Condolencia na esposa di Etty y famia, amigo, musico, muy especial na Trio Huasteca, su ex-coleganan docente y tur cu conoce y Aruba henter, Etty den su trayectorio artistico, hopi forsa den e momentonan dificil aki.
Cu Etty Sosega na Paza den Reino di Tata Celestial.
