Siman pasa mi por a tuma nota di varios plan pa energia alternativo pa Aruba. E plannan aki ta di aplaudi mirando cu nan lo ta na bienestar di Aruba. Lastimamente no por confia den e proyecto nan aki di parti di e gobierno aki di Evelyn Wever-Croes.
Durante e Gabinetenan di Mike Eman, pueblo a mira hopi progreso riba tereno di energia alterantivo. Aruba tabata lider den Caribe cu un proyecto tras di otro di energia renovabel. Mi por corda con Evelyn Wever Croes a bringa e proyecto di molina na Urirama cu tabata parti di e plan di Mike Eman pa yega 100% di energia renovabel hunto cu e parkenan solar. Supuestamente e tempo ey, e molinanan di biento lo ta malo pa salud di hende, mahos pa e medio ambiente y tambe lo stroba hende di haci oracion na Kapel di Alto Vista. Ora cu Gabinete Wever Croes a sinta a para tur cos pa 5 aña.
Ta pakico e cambio awor un cambio drastico di pensamento?
Ora para keto un rato y wak cual ta e desaroyo cu tabatin tras di e paramento di e proyectonan energia alternativo e tempo aya. Por ripara cu a para tur e proyectonan aki a base di caso den corte pa un cierto grupo di hende liga na e gobierno actual. Banda di e grupo ey, ta un cierto grupo di abogado cu tambe tin laso cu e gobierno actual ta esunnan cu a hiba e lucha nan aki den corte y asina a beneficia financieramente grandemente a costo di nos pueblo. Awe ta net e mesun hendenan aki ta bin dilanti y ta anuncia exactamente e mesun proyecto nan pa cu energia alternativa banda di desaroyo di e tereno di e refineria cu nan a para den pasado. E pregunta ta e ora, dicon ora di un gobierno di otro signatura e proyecto no ta bon pero awe si. Pero esaki ta nan forma di corupcion den forma di auto-enrikecemento. Nan a bringa pueblo y gobierno den pasado y por medio di haci uzo di buraco nan den nos leynan awe ta presenta e mesun proyecto nan aki. No ta por nada por wak tata, yiu, prima y amigo cu ta rondona e gobernantenan actual cu ta bakia den ley, ta den posicion clave. Pa varios aña e hende nan aki a bin ta mal uza y probecha di nos sistema di ley pa awe nan corona nan mes.
“Cueste lo que cueste” nan mester a para e proyectonan “green” den pasado. E echonan aki por cataloga nan como abuso contra pueblo. Abuso pasobra ta pueblo ta sufri ora cu WEB y Elmar mester hisa prijs di coriente, tanten cu si e molina nan a bin e tempo aya, e prijs por tabata mas stabiel na Aruba. Un otro ehempel di corupcion por medio di auto-enrikecemento ta e contractnan cu Eagle LNG. Kico a para cu e deal aki caminda tin hopi cos dudoso y famia envolvi den dje.
Nos no por tuma e gobierno actual na serio. Cada dia ta birando mas obvio cu e mascarada di e ministernan actual ta cayendo. Pueblo por wak cu den pasado nan a hunga wega politico, causando sufrimento den pueblo y pa awe nan bin hunga grandi. E mesun gobernantenan di awe a priva pueblo di tin un prijs di energia stabiel fo’i prome cu e pandemia y e guera di Ucraina. Awe ta hustamente e gobernantenan aki di e gabinetenan di Evelyn Wever-Croes, cu ta pone pueblo sufri subida den prijs di awa y coriente, kier bin tira santo den wowo di pueblo. Nan djis kier keda na poder pa nan por sigui cu nan forma nobo di corupcion: auto-enrikecemento mal uzando nos sistema di ley pa cu e proyectonan di energia alternativo.
