Mescos cu docentenan na otro scol, na Filomena College tambe a sinti un animo grandi pa cu apertura di aña nobo di scol
E Cuerpo di docente, segun director Raquel Lampe, a traha basta durante vakantie pa prepara e structura cu e muchanan por yega haya un ambiente agradabel pa haya les. A haci cambio necesario den algun lokaal y hasta a drecha baño. Pero tur cu bista pa un bon apertura di e aña.
A habri cu himno Aruba y como scol Catolico, tabatin e parti di oracion, unda a pidi forsa studiante, docente y e mayornan.
Despues a bay pa splica con cada klas ta hinca den otro y unda a ubica cada studiante. E mentornan tabata encarga pa splica e reglanan di scol y entrega rooster.
Esnan di prome aña a haya un recorido di e scol. E cuerpo di studiante ta basta grandi y for di 1ste te 4de tin tres klas di cada uno.
Principalmente pa esnan di prome aña e ta un experiencia diferente y un cambio for di basisschool pa un scol secundario. Incluso e mayornan tabata poco nervioso di e cambio aki. “Nos kier pa tur hende sa cu e muchanan ta yega aki y sinti cu nan ta na un cas di famia.” Tur esaki pa e muchanan sinti nan mes uni, un triangulo entre scol, mayor y alumno, hunto ta traha pa e exito di e alumno,
Diabierna lo ricibi e studiantenan di examen apart y na final henter e scol ta bini hunto pa conoce otro.
Pa esnan cu ta den examen, lo cuminsa pa traha di biaha cu nan, dunando nan hopi motivacion y guia necesario pasobra no mester lubida cu tempo ta pasa lihe. Ya aki dos siman tin anochi di mayor, pa nan pusha e muchanan cu den e tempo aki tin hopi distraccion. Scol mes ta bay ta hopi streng cu aparatonan electronico of celular. Ta reenforsa regla pa bienestar di e muchanan.
![](https://24ora.com/wp-content/uploads/2023/08/6B3A1476-1920x1280.jpg)
![](https://24ora.com/wp-content/uploads/2023/08/6B3A1508-1920x1280.jpg)
![](https://24ora.com/wp-content/uploads/2023/08/6B3A1496-1920x1280.jpg)
![](https://24ora.com/wp-content/uploads/2023/08/6B3A1615-1920x1280.jpg)
![](https://24ora.com/wp-content/uploads/2023/08/6B3A1673-960x1440.jpg)
![](https://24ora.com/wp-content/uploads/2023/08/6B3A1737-1920x1280.jpg)