Cu un sala completamente yen na Cas di Partido AVP, dirigentenan di e Partido berde a duna un splicacion rond di limitacion di Aruba su estado di derecho di parti di Presidente di Parlamento cu no kier scucha un grupo importante di stakeholder den cuadro di introduccion di BBO na frontera.
A papia cu e publico riba kico lo mester bay haci den cuadro di e reunion di diaranson mainta, unda cu probablemente e votacion lo tuma luga, cu aprobacion di e ley sin e cambionan sugeri door di gremio comercial y sin tene cuenta cu e consehonan di Raad van Advies.
E encuentro cu pueblo tabata un antesala riba e reunion publico den Parlamento. Na e sede por a tuma nota di presencia di drs. Arthur Dowers, kende a expresa cu e ley di BBO na frontera ta haci dolor. Esaki pa motibo cu e ta un medida mas den e serie di otronan tuma caba ultimo añanan.
Den forma comico e politico di AVP a papia di expresion haci door di Minister di Finanza kende a bisa cu e ta e Shakira di MEP y lo bay cuminsa factura awo pa debe di otronan. “”Loke cu e kier bay factura ta paga debe di nan mes y di ningun otro hende. …. Despues di a bisa pueblo cu ta bay goberna sin medida, a tuma un serie di medida cu cual a suta pueblo formalmente.” Y a agrega cu despues di aumenta e BBO,ta bay adelanta e cobransa di esaki na frontera, sabiendo cu e efecto lo no bay keda solamente na frontera. No por evita cu e forma propone door di Gobierno ta haci cu ta bay aumenta prijsnan y productonan ta bira inpagabel, Dowers a comenta.
Anteriormente Parlamento a para e reunion di BBO na frontera pero a resulta cu no tabata pa hopi tempo y di forma sorpresivo a yama esaki bek pa diaranson mainta, di un dia pa otro.
Dowers a bisa cu Gobierno no kier scucha niun hende ni instancianan. Ni Raad van Advies. No tin sentimento pa e personanan cu a traha duro pa lanta negoshi y cu lo wordo afecta cu introduccion di BBO na frontera, cu e excuus cu esaki ta pa paga debe bieu. Tur hende por nota, segun e politico di AVP, cu ta friend and family ta bay dilanti en bes di goberna sin medida, manera cu a priminti.
Por a nota presencia di Mike de Mezas, Parlamentario, kende tambe a expresa na esnan presente di e situacion pero a scucha tambe nan preocupacionnan. El a señala cu durante casi 6 aña a saca casi 2 biyon florin for di pueblo sin cu niun hende por bisa unda exactamente e placa bay. Loke si ta mira cu gobernantenan ta biaha rond di mundo y ta core rond den autonan caro, mientras cu pueblo ta sufri. Y hunto cu esaki awo kier bini cu un ley cu ta caba di horca e economia.
Raad van Advies mes a bisa, segun de Meza, cu e ley aki ta inaceptabel. Di otro banda politiconan sin ningun simpatia pa pueblo ta bini cu algo asina y dos dia prome cu reces ta bini cu medida cu ta caba cu economia di Aruba y aumenta e pobresa existente. “Si bo no por goberna y haci e bida di bo pueblo miho, anto bandona gobernacion,” ta e mensahe cu Mike de Meza a manda pa Gobierno.
Mike Eman ta esun cu a lidera e encuentro diamars anochi y a expresa cu e punto mas importante tabata pa splica e ciudadanonan cu e informacion ricibi cu e 7% lo no tin impacto riba cartera di ciudadanonan ta un fake news di Gobierno. Raad van Advies mes a bisa den su rapport cu e lo tin un impacto grandi riba e poder di compra.
Ta yega un momento, Eman a bisa, cu e reunionnan lo no tuma luga na Cas di Partido mas y lo mester hiba e mensahe te na porta di Bestuurskantoor. E momento aki cada bes ta bira mas necesario y esey ta loke e pueblo kier, si scucha e comentarionan den e reunion diamars anochi.
AVP ta prepara pa tin un plan cu cual ta bay Hulanda y habri un caminda nobo, cu perspectoiva pa Aruba. Y esey ta e compromiso cu a yega na dje diamars anochi cu esnan presente.
