Diabierna mainta a habri bastante ocupa pa e miembronan di sindicato SPA. A yama un reunion na POVA pa asina informa y busca un mandato cla for di nan miembronan.
Rolando Maduro den entrevista, a informa riba locual a delibera, informacion cu mester a comparti relaciona cu nan reunion cu altocomisario, nececidad interno riba entre otro material, edificio, ekipo y mas. Principalmente e recorte di 12.6% y locual ta e vision di e sindicato riba e tematica aki.
Den un reunion hopi sereno y atento, e miembronan presenta a haya bon presentacion pa asina tin bon comprondemento riba e punto cu sindicato ta para riba dje, como tambe tur otro sindicato cu ta sostene e lucha aki.
Maduro a duna di conoce cu e mandato di e miembronan sigur ta bay na prome luga, e decision cu nan tuma ta locual cu nan como sindicato lo trece dilanti. Si ta desea pa adapta orario y of dialoga na mesa, esaki lo ta decision tuma den reunion y asina sali cu e mandato aki pa e reunion cu gobierno cu lo tuma luga awe diabierna pa 4:00 pm cu mediador.
No ta descarta accion. E ta keda na e miembronan. E ta remarca tambe cu no ta unicamente e recorte tin nan atencion pero tambe e diferente problematica intern cu tin cu mester di atencion inmediato.
Sindicato SPA ta reconfirma na e comunidad, cu nan por ta trankil, cu miembro di cuerpo policial lo mantene ordo, lo sigui brinda nan servicio y lo continua di labora manera mester ta, lo contribui na e pais dushi aki cu nan stima cu ta Aruba. Lo laga e lucha den man di sindicato pa bringa pa nan derecho.
Sindicato SPA lo ta presente na reunion cu mediador y asina busca pa yega na un entendimiento, na momento cu yega na un acurdo lo comparti esaki cu prensa pa asina por comparti esaki cu comunidad.
