El a lanta awe mainta sali fo’i cas, a pasa cuminda e bisiñanan den su pickup di Setar y a bay traha normal. Pero parce atardi despues di trabou a cuminsa sinti e curpa malo. Awe nochi ainda el a bishita su restaurant faborito, Tai Hung Yung banda di su cas, a sali yega cas, haya un ataca di curason y fayece.
Stanley Pourrier ta un cara pa nos compania nacional Setar. Tur caminda ta top’e den su pickup y ta haci tur posibel pa tene nomber di su compania na halto. E tabata hopi ocupa cu e proyecto di camara pa polis y tabata trahando duro pa por keda cla pa e soft opening diabierna awo na Savaneta. Pero pa mas o menos 9:30 pm su proyecto a termina ora cu un ataca di curason a caba cu su bida.
El a bay laga atras un pareha y cuater yiu cu e stima hopi. Mesora famia y varios colega a yega su cas, situa na Caya Frere Fredericus 1A.
Stanley Pourrier ta e ruman mas chikito den su famia. E tabatin basta tempo ta lucha cu su salud, pa problema di curason, diabetes y un pia cu ta molesti’e. Cada biaha e ta bisa cu e lo bay dokter pa busca ayudo pero su trabou ocupa semper a haya preferencia. E ta e tipo di trahadonan leal cu hasta ora ta malo, ta bay traha toch.
Su coleganan a yega cu awa na wowo pa confronta cu e realidad cu nan colega stima no t’ey mas. Tur tabatin palabranan bunita so pa bisa di Stanley na su famia. Nan tur a keda sorprendi cu e noticia, pasobra nunca a mira malestar den cara di Stanley, cu ta un persona masha alegre, chaskero, pero specialmente servicial pa hiba su compania padilanti.
Ta desea famia y tur trahado di Setar hopi forsa den e momento di tristesa aki. Cu Stanley Pourrier sosega na paz.
