Ayera nochi parlamentario a keda sorprendi pa un reunion awe cu e comision central. Den e reunion aki nan mester a trata e topico di firmamento cu Hulanda, cual tin di sosode diabierna awo.
Fraccion di AVP ta lamenta cu esaki no a pasa den un reunion publico. Informacion cu Parlamento ta haya for di gobierno ta di reunion publico. E reunion a pasa den uno central y mayoria a dicidi di duna gobierno nan sosten. Richard Arends di AVP a expresa cu na varios ocasion a bisa di no ta haya nan mes den e base legal y convenci pa yega na e meta tin otro camindanan pa cana.
AVP no ta sinti cu gobierno a haci esey. Fraccion di AVP ta haya cu esaki ta algo innecesario y ta compronde e urgencia y cu gobierno ta lomba contra muraya. P’esey AVP a scoge pa laga mayoritario di Parlamento dicidi.
Parlamentario Independiente Daphne Lejuez a expresa cu oproep ayera nochi, p’esey awe el a pidi p’e documento specifico, pero nan no a hay’e. Loke a bisa nan ta pa mira e documentonan di juni, augustus, september y loke a duna Parlamento na november, pero un documento specifico no tabata tin. E parlamentario ta haya cu e tabata un tiki dificil pero di otro banda tabata importante pa firma. Aunke cu el a firma, Lejuez a haci esey en espera di haya e version cu ta firma. E comunidad kier trankilidad siguridad cu e fondonan t’ey pero tambe cu tin fondo pa restart economia.
Ricardo Croes, lider di fraccion RED, a bisa cu su coleganan a bisa di no tabatin mucho cambio den e documentonan, pero dicon a bisa di no sostene y awo si. Un cambio importante a tuma luga ta con ta permiti e identidad tuma decision, pasobra tabata consisti di tres Hulandes. Awo e ta consisti di dos persona di Aruba, pero Parlamento y gobierno no a perde autoridad. Un punto di discusion tabata e problema tabata pasa over di gobierno y Parlamento pa tin autoridad den companianan estatal. Si a sigui di bisa no manera oposicion, e gobierno lo por a paga 30% di loonsubsidie, 30% di bijstand, 30% salario. P’e rijkswet por funciona, tur ta pa tempo limita, segun e parlamentario. El a bisa cu parlamentario de Meza a trece dilanti cu Aruba a pasa den diferente cos cu Hulanda y esaki ta e modus operandus di Hulanda pa pone presion.
Alan Howell di POR a bisa cu e dia cu el a premira a yega. Na diferente ocasion el a splica cu e mandatario a yega Parlamento pa informa con e situacion financiero di Aruba ta. E ta sinti cu e mandatario a bin cu tur sinceridad riba e asunto aki. Rosea ta cabando y lo yega momento pa hala stap atras y bin cu pasonan firme. Pa Howel e firmamento mester a tuma luga caba, pasobra Aruba mester di dje. No tin salida y mester 209 miyon florin pa fin di aña, pasobra na momento cu otro aña habri ainda mester di placa. Hulanda a priminti pa no bin goberna Aruba pero pa yuda e isla. Si no duna gobierno e sosten e situacion lo bira pio, segun Howell. P’esey e ta gradici na Hulanda p’e yudansa aki.
Fraccion di MEP a sostene esaki cu un sabor amargo, segun Rocco Tjon, lider di e fraccion. Prome cu COVID a yega, gobierno tabata hiba un maneho financiero responsabel. Pero despues a hay’e confronta cu COVID y e actitud di Hulanda p’e negociacionnan aki. A finalisa e aspecto financiero, unda a garantisa e parti salarial. Te cu december lo tin suficiente financia pa brinda e diferente programa di sosten. Ta garantisa cu no lo mester bin cu un otro corte den salarial p’e empleadonan publico.
Setty Yarzagarai di MEP a bisa cu Aruba ta para na un grens cu no tin mucho placa mas. Esey ta nifica cu e empleado publico no lo por cobra nan salario completo. Gobierno no por want’e hopi mas, p’esey riba mercado local a logra haya 160 miyon y ainda a keda un buraco p’e presupuesto presenta di 206 miyon. Si no a haci esey, nan lo a cay den hopi problema.
Parlamentario Edgard Vrolijk di MEP a bisa di a aproba cu gobierno lo firma e pakete cu Hulanda, cual ta uno hopi necesario. Na e momentonan aki un grupo grandi por perde trabou y mester e placa disponibel pa por cubri FASE, loonsubsidie, salario p’e pais aki por sigui draai.