Roy Lintz, miho conoci como Lord Cachete, no ta un persona desconoci na Aruba. Sigur no den e temporada di Carnaval. E ta un vocalista y un presentado (performer). Pa mas di tres decada caba e ta entrene su audiencia, su publico cu su cancionnanpero tambe pa su baile unico y di manera humoristico.
E ta masha popular mes dentro di e comunidad Arubiano y ta un persona masha stima pa e pueblo, tanto riba escenario como pafo di dje.
Net prome cu el a subi avion p’e regresa Hulanda, nos di 24ora.com a probecha di combersa cu ne un rato, p’asina e conta nos un poco di su bida Carnavalesco.
PRINS & PANCHO
Cachete semper a gusta Carnaval. Tabata na 1982 cu el a bay competi pa prins y pancho hubenil, hunto cu Jeffrey Schuilenburg, como Prins Cachete y Pancho Mokete. E tempo ey nan a representa Voz di Aruba. Y nan a resulta ganado pa cual nan tabata tin e honor di dirigi e carnaval hubenil.
Na 1984, un biaha mas e duo dinamico ta subi stage como Prins Sorpresa y Pancho Loco.
Na 1989, e mesun duo dinamico aki ta purba nan suerte un biaha mas den e competencia di prins & pancho, pero e biaha aki como Prins & Pancho di Aruba su carnaval. Nan a competi bou di e nomber di Prins Cachete y Pancho
Den total, Cachete a train 16 pareha pa prins & pancho cu a sa di bin cu e corona tambe.
CALYPSO
Na 1986, Cachete a bay canta Calypso y esey tabata e aña cu el a haya e nomber ‘Lord Cachete’. E nomber ey tabata e nomber cu Moira Loei – A – Tjam y Magda Nicolas a dun’e y te dia djawe, e ta uzand’e. Un nomber cu nan a bin cu ne y a anuncie den cura di Club Boneriano.
E tempo ey su composicion tabata di Ramon Sharp.
Den henter su trayectoria, Lord Cachete ta canta cu diferente banda, manera Claudius & OREO, Dushi Band.
TRIBUTO DI SETAR PA 70 AÑA DI CARNAVAL
Diabierna, dia 5 di januari, nos compania di comunicacion nacional a organisa un fiesta unda cu a rindi tributo na 70 aña di nos carnaval.
Cachete a gosa di e anochi aki, ya cu e ta opina cu e grandinan mester cuminsa habri caminda pa e generacion nobo. Pero si ta aprecia cu, a pesar di tanto sanger nobo, e generacion anterior ainda ta hopi solicita.
Ta un honor p’e pa a forma parti di e anochi grandioso aki, unda cu a uni tur e amantenan di Carnaval, pa hunto duna e publico presente, un show fenomenal. Cada un di nan a duna lo miho di nan pasobra cu nan ta stima Carnaval. Y ta pa e pueblo nan ta hacie, pasobra sin publico, no tin Carnaval.
MIHO EXITONAN
Cachete, den su casi cuater decada di trayecto musical den e mundo di Carnaval, ta masha hopi exito e tin, e.o. : Eh, eh, 65 on the road, Neighbor it’s carnival. Pero dos cu sigur, sigur cu ta bin dilanti ta su dos exitonan di mas grandi di tur tempo: Aruba Dushi Tera (Carnaval 44) y The Clock (Carnaval 50).
Aruba Dushi Tera tabata algo excepcional, mirando cu e aña ey, 1998 Cachete a subi stage c’un brassband riba escenario como parti di su show y tambe The Clock, su gran exito di Carnaval 50, cual a haci un furor riba caya durante e paradanan. Y Cachete, como un gran showman, a trece bida den su cancion y asina tambe pone e publico cant’i caminda, baila y gosa hunto cu ne.Pa mas lesa TREMPAN.
