E proefboring aki ta mas bien un prueba. Segun Armando Currett, director di compania Arubano di Petroleo, ta un pos di exploracion.
Durante di e proefboring aki lo haya informacion di subsuelo y lo bay haci tur e diferente testnan cu tin cu haci pa comproba cu loke a anticipa pa encontra ta cuadra y ademas si loke a interpreta cu ta bay ta bo reserva berdaderamente ta un reserva cu ta contene hidrocarburo, petroleo of gas. Bo por compare un poco manera un kijkoperatie.
Fase 4
Fase 4 ta ora cu cos bay bon y cu berdaderamente tin un discubrimento cu ta comercial y despues cu haci un calculacion di e desaroyo, ta bay den produccion. E fase di produccion por dura te cu 25 aña desde e momento cu tin e descubrimento of si ambos partido bay di acuerdo y si tin reserva ainda, por prolonga esaki. Ta bastante standard cu tempo di produccion ta den ordo di magnitud di 25 aña.
Den cada fase tin un chens di un go of un no go di parti di e operator, cu ta esun cu ta inverti e placa y e riesgo capital. Ta asina si cu por ehempel den e fase di produccion, fase 4, ta plannan di produccion mester wordo aproba door di CAP. Pero durante fasenan di exploracion, CAP y Repsol ta consulta over di e programa, pero no ta aproba of laga di aproba e plannan di exploracion. Claro si, Repsol tin cu cumpli cu tur e rekisitonan di siguridad, di proteccion di medio ambiente, cu tanto contract como ley ta perscribi.
Paisnan den vecindario
Currett a splica cu e pais cu ta cerca di dje ta Venezuela y for di añanan 80 caba of prome cu esey, final di añanan 70, tin un tratado di dilimitacion di e frontera maritimo, entre ambos pais. Esey no ta ningun problema. Tabata tin custumber, tanto di banda di Aruba, como di parti di Venezuela cu aunke no tabata ningun obligacion, pero ora cu tabata tin sismica y cu e barco ta cerca di e frontera of mester crusa frontera pa dal un buelta, cu e paisnan ta notifica otro. Si tin cu pone un proefboring dentro di un distancia di un miya nautico for di e frontera maritimo, e ora si tin un obligacion pa haci un notificacion na e otro pais. Pero esaki no ta tumando of no lo tuma luga, pa loke ta locacionnan cu ta panort di e isla.
CAP satisfecho
E trabaonan ta bayendo den un forma cu ta normal den e tipo di proyectonan aki y e trabaonan ta bayendo segun schedule. Hasta den e sentido cu e shift, e rek cu a duna na final di fase 2 ta como si fuera cu si tur cos bay door, e proefboring den curso di 2018, ta como si fuera nada no a pasa.
Contacto cu Repsol
E contacto ta casi diario cu Repsol. Tabata tin un cambio cu e country manager anterior, sr. Hernandez, kende a wordo traslada pa un otro posicion, un otro luga y awor aki tin un otro persona na su luga.
