Minister Geoffrey Wever y e delegacion di Aruba a reuni diaranson mainta cu dos compania di logistica di Surnam pa discuti transporte y logistica.
Durante e reunionnan aki e dos empresanan a splica e delegacion di Aruba riba e posibilidad pa transporta container di Surnam pa Aruba y tambe con por consolida diferente producto den un container.
Aki e mandatario a duna un ehempel tocante consolida containernan na Surnam: Si comerciantenan kier uza un container por bin Aruba for di Surnam, un grupo di comerciante di Aruba por uni y trece nan productonan hunto pa Aruba den un solo container.
E delegacion di Aruba a haya un splicacion di e tarifanan di container, e tempo cu ta tarda pa un container yega Aruba y varios otro topico relaciona cu e transporte di producto. Na Surnam tin dos empresa cu por ofrece e servicio aki. E reunion a termina cu un palabracion di con por transporta producto na un forma mas consistente.
Wever a mustra cu e delegacion Rubiano a ricibi un splicacion con e sistema di transporte ta funciona for di Surnam. E mandatario a mustra cu a haya un miho bista pa por compronde con e proceso ta funciona, y a establece e contactonan directo na Surnam. A palabra cu pa otro siman lo tin un “sesion virtual” cu lo facilita e comerciantenan na Aruba cu mas informacion.
“Awor nos ta den contacto cu e dos empresanan aki y nos tin e formula con pa transporta producto di Surnam pa Aruba y nos sa con pa consolida, y con pa percura cu tur siman tin un carga di Surnam pa Aruba. Consistencia ta importante.”, segun e minister a indica.
