Business to Business (B2B) ta e mision comercial di Aruba cu a biaha pa Surnam y encabesa pa e Minister di Asuntonan Economico, mr. Geoffrey Wever. E reaccionnan di e prome dianan tabata positivo manera cu nan a spera. E delegacion di Aruba a haya chens pa topa cu inversionistanan di diferente sector, segun Sue-Ellen de Freitas Sousa, Hefe di Business Information & Support KvK (Kamer van Koophandel Aruba).
E ehecutivo di KVK a conta cu e B2B a cuminsa diamars den oranan di atardi y a sigui diaranson mainta entre diferente negoshi di Aruba cu esunnan di Surnam, como parti di e mision comercial.
E B2B ta encuentro entre sector comercial di Aruba cu esunnan di Surnam den varios sector. Por menciona sector hotelero, ICT, construccion y importacion / exportacion. DI e forma aki ta explora e posibilidadnan comercial di ambos banda.
Tur cos ta mustra cu ta bayendo den bon direccion. A haya reaccion positivo di e companianan local despues di e prome dia di reunion caba. KvK y VSB (Vereniging Surinaams Bedrijven) a regla tur cos. E citanan a bay bon. A enfatisa cu e meta ta pa explora e posibilidadnan y ta hayando bon reaccion.
E delegacion ta contento cu e preparacion haci door di VSB cu a logra den un tempo cortico pa busca e miho negoshinan cu lo por fit den loke cu Aruba mester.
