Ombudsman t’un proceso cu a cuminsa 14 aña pasa ora cu a pasa e ley na 2010. Djey tabatin algun cambio cu a haci y na 2021 a bolbe trece den parlamento di Aruba. A wanta cu ne debi na shete amienda cu no tabatin aprobacion di e mayoria. A bolbe acerca e fraccionnan nobo e tempo ey p’asina mira con por yega na otro pa cu e proceso kita y nombra e ombudsman.
Tampoco a ricibi sosten, ta apenas fraccion di MEP y RAIZ a aproba pero no tabata suficiente. Vrolijk como iniciado di ley a bisa cu tin cu ancra e proceso, a acerca Misha Raymond y Tromp-Lee kende a bira co-iniciado di e ley. A institui un comision kende ta consisti di Raad van Advies, Gemeenschappelijk hof y ARA. Nan t’esunnan cu a pone e reglanan pa cu e buscamento di un ombudsman. Caminda hasta DIMP, OM y VDA tabata envolvi den e proceso.
Riba 13 di juni ultimo, e comision a trece nan rapport caminda tin tres nomber cu nan a scoge. Pronto, e comision lo ta den parlamento pa splica con e proceso a camina y dicon a dura cu ne. Claro, cada fraccion y parlamentario lo tin e espacio pa comenta y duna nan pensamento riba e nombernan cu a ricibi. Na final durante un reunion publico lo anuncia ken lo bira e defensor di pueblo. Ta spera cu e proceso lo dura corto na parlamento.
E intencion ta cu pa prome di september proximo, lo huramenta e defensor di pueblo den parlamento. Claro, tin cu warda un rato p’asina e defensor busca algun experticio y claro cu esun di Corsou y St. Maarten, lo yud’e den e proceso. E ombudsman lo sigura cu lo sali na defensa di e pueblo. Caminda lo cuestiona y sugeri riba maneho di sea minister of departamentonan cu no ta traha na fabor di e pueblo.
