Darlaine Guedez-Erasmus (MEP): Un persona cu limitacion tambe mester por haya oportunidad pa drenta mercado laboral

Na Aruba segun Censo 2020 nos tin 5359 persona cu un limitacion, di cual 841 ta trahando y 107 ta buscando trabou. Tin 4408 persona cu ta non-actief. E grupo aki lo mester investiga mas pa sa si nan por traha of gewoon nan no ta buscando trabou, pasobra nan ta pensa cu nan no ta haya trabou. Vooral cu a wordo midi den aña 2020 (aña di pandemia). 

Como Parlamentario, Guedez-Erasmus ta haya sumamente importante pa personanan cu limitacion haya mas oportunidad pa haya un trabou asina tambe por ta independiente y tin su bienestar propio. Den reunionnan den Parlamento, hopi biaha e sa trece e tema aki padilanti y riba diferente areanan mirando nan necesidadnan. 

Diaranson prome di maart 2023 di 7:00pm – 8:30 pm na Sonrisa, Pavia 19-b lo tin oportunidad pa asina personanan cu limitacion por acudi pa asina papia cu personanan di Directie Sociale Zaken, jobcoach di Trampolin pa trabou y tambe Uitzendbureau basa riba e tema di trabou. 

Si acaso ta ricibi gehandicapten uitkering, lo ta importante pa t’ey presente, pa asina por scucha kico lo por haci den e caso aki. Si bo tin familiar of conoci cu tin un of otro limitacion, motiv’e pa e por ta presente e anochi aki y tambe pa e por busca un trabou cu e ta gusta segun su habilidad. 

Companianan ta partnernan hopi importante e anochi aki, paso nos mester mas companianan na Aruba cu ta dispuesto pa duna oportunidad pa trabou na personanan cu limitacion. Sigur asina ta laga nan sinti bon y cu berdaderamente nan ta forma parti di nos comunidad. Di otro banda  personanan cu limitacion den companianan, ta trece un ambiente hopi positivo na trabou. 

Por ultimo, parlamentario Guedez-Erasmus  kier gradici Trampolin pa Trabou, Sonrisa y Plataforma pa Hendenan cu Limitacion cu nan trabou fantastico cu nan ta haci pa nos personanan cu limitacion. Danki pa boso dedicacion.