“Caya ta papia cu e sospechoso ta un hoben cu ta biba den e cas ey mes na Dakota”, asina un testigo a sigura na e sitio di asesinato. Pero kico ta e motibo pa a maltrata e victima ta mat’e, ainda ta desconoci y ta parti di e investigacion cu ta den man di e ekipo di recherche di Oranjestad. Te awo, e prome indicacion ta cu e sospechoso a uza un palo pa a bati e victima cu ne na su cabes, coherente biaha, te ora cu el a muri benta na suela den Pindastraat na Dakota.
E caso
Polis a haya un yamada awe nochi pa 7:50 pm pidiendo presencia di polis pa un pelea grandi na un casi den Pindastraat na Dakota. Pero pa ora polis y ambulance a yega, ya e victima tabata morto. A detene e posibel asesino y un hende cu a stroba polis di traha eybou. E victima ta Esdras Daniel Tejada, naci dia 7 di januari 1989 (35 aña) na Republica Dominicana.
Polis falta informacion
Tanto e testigonan como e habitantenan di e cas no ta bisando mucho, pa cual ainda ta dificil pa por saca un conclusion di kico a pasa eynan y con e asesinato a tuma luga. P’esey ta pidi comunidad ayudo, pa si tin hende cu a mira algo of sa algo, pa yama e tipline di polis, 11141 y duna bo informacion den forma anonimo.
Prome asesinato p’e aña ‘ki
Nos ta na e di shete luna di aña 2024 y te awo nos a conoce e prome caso di asesinato. Por bisa cu Aruba tabatin e situacion bon bou control. Esaki compara cu otro añanan, unda di inicio di aña caba ta cuminsa raporta asesinato. E reto awo ta pa purba mantene e cifra aki mas abou posibel.
Aña pasa tabatin cuater asesinato
E prome asesinato pa aña 2023 a tuma luga na januari, ora cu a maltrata un homber severamente y cu despues a fayece. A detene dos sospechoso e tempo ey. E victima mes a muri te na maart, pues dos luna despues. E aña a sigui trankil, pero na juli a sigui dos caso tra’i otro; un “drive-by shooting” na altura di ex-United Dinner den Driemasterstraat cu a costa bida di Nayibe Isabel Herrera, naci na Aruba, dia 22 di september 1991, pues di apenas 31 aña di edad. E tabata mama di dos yiu chikito, cu awo a keda atras sin nan mama. Te dia di awe no a detene ningun hende den e caso aki y a pasa pa bira un “cold case.”
E otro asesinato na juli 2023 tabata dia 19 di juli 2023 ora cu e homber Miguel Jose Garcia Moreno di 35 aña di edad, naci na Venezuela, a asesina su pareha, Leila Contreras Romero di 48 aña di edad, den su cas na Washington. Ora el a caba el a bay na altura di Bushiribana y a pone un fin na su mesun bida. E di cuater caso a sosode dia 24 di december 2023 na Matividiri ora cu a mata Sergio Maduro. Na februari di e aña aki a detene e pareha di Sergio y un amigo, sospecha di ta e dos asesinonan. E caso no a bin dilanti ainda.
Asesinato na Aruba
E ultimo añanan, debi na miho trabou di prevencion di polis, combina cu un porcentahe halto di solucion di caso, un di esunnan di mas halto den nos region, a haci cu casonan di asesinato a baha. Cu excepcion di aña 2018 y 2021 cu tabatin un “peak”, mayoria aña e situacion tabata basta bou control. Aruba a percura cu durante pandemia, a wanta crimen asina abou cu no tabatin ningun asesinato, loke pa hopi aña no a logra.
● Aña 2018 – 6 asesinato
● Aña 2019 – 3 asesinato
● Aña 2020 – 0 asesinato
● Aña 2021 – 8 asesinato
● Aña 2022 – 3 asesinato
● Aña 2023 – 4 asesinato
● Aña 2024 – 1 asesinato (te awo)
