Aña pasa a surgi un desacuerdo relaciona cu un posibel fusion di Instituto Medico San Nicolas (ImSan) y Dr. Horacio E. Oduber Hospital (HOH). Pues, no tabata mucho bisto si esaki lo bira un cooperacion intenso of un fusion real entre e dos institutonan aki.
December ultimo Ronald van Trigt, persona di confiansa di minister Dangui Oduber, kende tabata apunta pa encabesa e proceso pa promove cooperacion, eficiencia y productividad, a bisa cu e palabra fuseer no ta riba mesa.
Di un otro banda, AZV, entidad cu ta cubri mayoria gasto di tanto HOH como ImSan, a expresa di ta convenci cu un cooperacion of hasta posibel fusion lo por traduci den un reduccion di gasto di mas o menos cinco miyon florin pa aña. Como condicion pa sosten di likides di Hulanda, recorte den cuido medico di 60 miyon florin pa aña tabata un dje condicionnan primordial.
Entretanto, minister di salud, Dangui Oduber, a expresa cu esaki ta en berdad un discusion cu ta andando e ultimo lunanan caba, pues di e posibel fusion y cu e punto di bista di gobierno semper tabata pa yega na un acuerdo di cooperacion (MoU) entre e dos institutonan aki prome cu un fusion por tuma luga.
Pa un relato mas amplio lesa edicion di TREMPAN.
