Diamars, algo pasa di 1’or y 35 di madruga, patruya di Noord a bay riba e caminda di Hato caminda cu lo tabata tin un Suzuki Swift coriendo y un persona kier tira su curpa for di e auto. Na altura di e post di Cuerpo di Bombero na Tanki Flip, nan a bin topa cu e Suzuki Swift color shinishi, numera A-10077, para bandi caminda, akinan cu dos dama para pafo di e auto. Un di e damanan ta splica polis cu su amiga a haya problema cu un familiar. Riba dje e ta bao di influencia di alcohol y kier a tira su curpa for di auto. Polis a purba di interveni y papia cu e dama, kende tabata histerico e momento ey, pa e calma y e no bay haci locura cu su curpa. Despues di basta papiamento a bin logra calma e dama. Polis a hib’e su cas pa asina e drumi sosega. E otro amiga a sigui su caminda.
