Dialuna marduga presencia di polis tabata necesario na altura di e mall di King Plaza. Un chauffeur femenino kier a bandona e sitio despues di dal dos auto. E tabata bebi segun testigonan. Polis a yega y topa e señora.
Polis a mira mesora cu e ta bou influencia. Asina mes a busca e aparato pa e supla prome cu bay over na detencion. Ora a bise supla e no por a supla tampoco. A dune tres chens y ningun di tres el a supla bon. Na dado momento a cuminsa hari tambe e polisnan cu a pidie supla. Si un hende supla y e faya asina, kiermen e por keda deteni cu e peso completo di ley pa loke ta core auto bou influencia.
A hibe warda di Shaba den e transporte policial. Tambe polis a atende cu e chauffeurnan di e auto Vitara y Camry cu e señora bebi a dal den dje cu su auto.
